Али Ахмети и Муса Џафери ќе треба да ги обезбедат адвокатот и нотарот пред кои наводно Слободан Богоевски, кого го тужат за клевета ја дал спорната изјава. Ова го нареди судијата на денешното подготвително рочиште. Исто така, тужителите треба да го обезбедат и оригиналниот транскрипт од изјавата на Богоевски пред американските власти.
Судот ниту денеска не се произнесе по барањето на одбраната на Богоевски за утврдување на надлежност на македонскиот суд. Според адвокатот на Богоевски, Валентин Зафиров македонскиот суд е ненадлежен бидејќи изјавата на Богоевски дадена за потребите на постапка во САД и е дадена во американската амбасада која, според меѓународното право, не е територија н Република Македонија.
Богоевски најави дека ако граѓанскиот суд не се прогласи за ненадлежен, тој ќе поднесе тужба против судијата, како и против сите инволвирани во постапката.
Следното подготвително рочиште во граѓанскиот суд е закажано за на 25 мај.
Ахмети и Џафери од Богоевски бараат отштета вкупно 5.5 милиони денари, Ахмети бара 3 милиони денари, а Џафери 2,5 милиони денари.