Судското рочиште за активистот на Шарената револуција а сега кандидат за пратеник, Павле Богоевски, обвинет за учество во толпа која предизвикала материјална штета врз зградата на Министерството за култура за време на протестите, повторно е одложено.
Судијката го одложи судењето за 21.декември откако обвинителката достави вештачење за штетата, изготвено според датумот, на 5 мај, два и пол месеци пред да биде поднесено обвинението.
Вештачењето беше изненадување за судијката и за одбраната откако минатиот пат судењето се одложи поради тоа што самото Министерство немаше пријавено штета во обвинителниот акт против Богоевски.
Адвокатот од одбраната Сашо Дуковски побара одлагање, потенцирајќи дека треба да го анализираат вештачењето.
– Има еден факт кој што спротивно на минатото рочиште, кога се бараше претставник, сега излезе писмено вештачење за наводната штета. Треба да го анализираме дали е тоа релевантно, дали е направено од овластен орган, дали е нарачано од овластен орган. Видов многу нули таму, ќе анализираме и ќе заземеме став, изјави Дуковски.
Павле Богоевски не даде изјава, образложувајќи дека како кандидат за пратеник би го прекршил Изборниот законик.
Седумина учесници на протестите на Шарената револуција добија кривични пријави поради основан сомнеж дека учествувале во толпа што ќе изврши кривично дело, а кои се однесуваат на протестите пред Министерството за култура, кога беше обоена фасадата на објектот за кој Обвинителството вели е објект од културно наследство.