По барање на Државното правобранителство за дополнително разгледување на доказите на одбраната и подготвување за да се произнесе за штетата, судската расправа за кривичната пријава кон Мариглен Демири е одложена за 22.ноември во 12 часот.
Мариглен Демири “се товари“ за учество на протестите од оваа година како еден од демонстрантите кои ја демолирале Народната канцеларија на претседателот Ѓорѓе Иванов.
Партијата Левица, чиј припадник е Демири, пред почетокот на судската расправа денес, остро реагираше дека власта се плаши од Левица бидејќи и трет нивен член е повикан во судските простории, но најавија истрајност бидејќи, како што велат одбраната е подготвена.
– Ова е отворен политички прогон врз највиското раководство на Левица. Како се наближуваат изборите, тој прогон од кривичен продолжува во физички. Ова е трет член од највисоките партиски органи кој се гони за дело кое не постои. Правниот тим на Левица, заедно со адвокатите немаат намера да признаат вина. Ние ќе се судиме до крај, изјави Димитар Апасиев од партијата Левица.
Тој соопшти дека за прогонот кон Левица алармирани се сите меѓународни релевантни фактори а претставници на партијата присуствувале и во Стразбур каде на највисоко ниво го поставиле ова прашање.
– Тоа ќе влијае врз рангирањето на политичките права и слободи на земјата, реагира Апасиев.
Кривични пријави освен против Демири има и против Здравко Савески и Владимир Куновски од Левица.
– Очигледно режимот се плаши од Левица и сака да изврши притисок преку судската власт да не замолчат, тоа нема да им успее, изјави пак Здравко Савески дополнувајќи дека кривичните кон нив даваат впечаток дека тие се прогонуваат.