Кривичниот суд утрово го одложи рочиштето за новинарот Зоран Божиновски, обвинет во случајот „Шпион“.
Судијката во предметот, Александра Крстиќ посочи дека иако судот доставил барање до Апелација да се достават сите доказни материјали поврзани со предметот, се до започнување на денешното рочиште, Апелација не го направила тоа.
Судијката Крстиќ рече дека токму поради ова, донела наредба Божиновски воопшто да не биде донесен во судот, бидејќи како што рече таа, нема услови за одржување на рочиштето.
Денеска пред судот, појавување на Божиновски очекуваа и неговите колеги новинари кои на мирен протест побараа судот да го укине притворот за Божиновски.
Во случајот „Шпион, на 18 обвинети им се суди за злосторничко здружување, шпионажа и уцена, опфатени се поранешни и сегашни разузнавачи од цивилното и военото разузнавање, екс полициски службеници, екс директорот на Управата за борба против перење пари, екс шефот на Претседателот на Собранието на Република Македонија.
Меѓу нив е и новинарот Зоран Божиновски кој се товари за три дела, но неговата постапка беше во прекин, затоа што српските власти кои го уапсија во 2013 година, не ѝ го испорачуваа на Македонија, сѐ до март годинава, кога во „брза“ постапка, за само еден ден, беше екстрадиран.