Денешното рочиште за случајот „Поткуп“ во кој обвинет е лидерот на СДСМ, Зоран Заев беше одложено за 4 мај по барање на одбраната да им бидат доставени сите докази од предметот кои се уште не им се доставени од страна на Обвинителството, иако вакви барања имало повеќе пати досега.
Адвокатот Филип Медарски истакна дека нивно законско право е да ги имаат доказите во рака бидејќи според Законот за кривична постапка нив треба да ги добијата уште кога им бил доставен обвинителниот акт. Тие направиле увид на доказите, меѓутоа не добиле копија.
Обвинителот Владимир Милошески од Одделот за организиран криминал, чиј мандат во меѓувреме е продолжен и останува на овој предмет, појасни дека доказите со ПИ мерки по завршувањето на истрагата му се предадени на Судот и тие се во еден примерок, кој ги има само Судот.
Судијката Дијана Груевска Илиевска го задолжи Обвинителството да ги достави доказите за да можат адвокатите да подготват одбрана и на следното рочиште да биде изнесен обвинителниот акт и воведните обраќање на Заев и адвокатите.
За Заев спорно е тоа што при увидот што го имаат направено, по завршување на истражната постапка, не им била дадена на увид наредбата за спроведување на посебни истражни мерки , што според него, е клучно за да се утврди дали тој бил следен надвор од законската рамка.
Заев рече дека од двеста страни докази против него дека наводно барал поткуп за изградба на црква, Обвинителството до денеска не му дало ниту една страна, ниту еден доказ. Се сомнева дека Обвинителот и Обвинителсвото од коешто што доаѓа ги имаат тие докази од прислушуваните телефонски разговори и видео снимки од разговорот со бизнисменот Иван Николов од кој наводно барал поткуп и секојдневно ги преслушуваат и си креираат, како што рече Заев, нови дела и обвиненија против него.
– Наредбите ги бараме уште од самиот момент на предистражна и истражна постапка, на донесување на обвинителен акт и како што гледате до денеска не можеме да добиеме препис од наредбите за да можеме да ја видиме законитонста на начините на постапката на обезбедување на посебните истражни мерки и моето телефонско слушање на двата телефонски броеви. Во другите случаеви, на пример во „Пуч“ тоа ни беше овозможено. Тоа е право на одбраната да има свој увид. Во овој случај тоа не е овозможено, ние искрено се сомневаме во незаконитоста на постапката, на обезбедувањето на посебните истражни мерки имајќи во предвид дека државното јавно обвинителство токму овие прислушкувани разговори си ги разгледува секојдневно, си создава нови предмети, си шири нови истраги, си отвора нови предистражни постапки, сосема различни од оваа. Сето ова ни индицира сериозно сомневање за законитоста во постапката на посебните истражни мерки коишто се составен дел од самото темелење на докази за обвинението, кадешто се работи точно за следење на моите телефонски разговори, изјави Заев за медиумите.