Никој од 66 патници и членови на екипажот на иранскиот авион не ја преживеа несреќата што се случи утрово во планинскиот дел на централен Иран, соопштија официјални лица од авионската компанија „Асеман ерлајнс“.
Авионот летал на релација Техеран-Јасуџ, кога се урнал во планините Загрос. Тој исчезнал од радарот еден час по полетувањето од иранскиот главен град, при што се урнал 22 километри пред да требало да слета. Во авионот од француско производство имало 60 патници и шест членови на екипажот.
-По пребарувањето на областа, за жал, мора да информираме дека авионот се урнал и сите што биле во него загинале, изјави портпаролот на компанијата, Моамад Табатабаи.
Поради лошите временски услови во регионот, спасувачките екипи не можеле да пристапат со хеликоптери, туку морале да патуваат по копно.
„Асеман ерлајнс“ е компанија која сообраќа главно на домашни линии, поврзувајќи го Техеран со помали градови во внатрешноста.