Поради пандемијата со ковид-19 и мерките донесени од страна на Владата, на свечената прослава по повод јубилејот 30 години независност на државата која во среда ќе се одржи пред Собранието, ќе присуствува органичен број граѓани
Според информациите од Владата, на настанот сите присутни ќе добијат билет за влез, а ќе треба да имаат и сертификат за вакцинација или прележан ковид-19 и ќе седат на столчиња кои ќе бидат поставени на одалеченост од 1,5 метар.
На прославата освен државниот врв и високите гости, ќе може да присуствуваат од 800 до 1.000 граѓани кои за да добијат билет ќе треба да се пријават преку платформата е-билет.
– Пријавувањето ќе биде преку платформата е-билет, односно исто како што беше организирано присуството на граѓани при посетата на Папата на Скопје. Поради пандемијата, мораме да го ограничиме бројот на присутни затоа што најважно е колективното здравје, велат од Владата.
Обраќања ќе имаат претседателот Стево Пендаровски, премиерот Зоран Заев и претседателот на Собранието Талат Џафери. Потоа ќе следи музичка програма, на која ќе настапат домашни пејачи и групи. Од Владата кажаа дека странски гости нема да им во музичкиот дел, а имињата на домашните пејачи ќе бидат изненадување.