Се е подготвено за Првата меѓународна конференција, најголема по својот формат, што воопшто ја има организирано државава а насловена како „Западен Балкан: Делот што недостига за Европа да биде целосна “ која се одржува во рамки на Преспа форумот за дијалог. Охрид и Отешево каде овие два дена ќе се реализираат многу панел дискусии, собраа на едно место околу 300 гости тргнувајќи од високи претставници на Американската администрација, шефови на држави и на влади, министри, тинк тенк организации, граѓански сектор како и стотина новинари што само по себе говори за големиот медиумски интерес за ова случување.Темите поставени на конференцијата се пред се поврзани со Европската Унија, нашето пристапување кон ЕУ, интеграцијата на Западен Балкан па се до трансатлантските односи отсликани преку врските САД/ЕУ/НАТО. Организатор на конференцијата е Владата на Република Северна Македонија односно Министерството за надворешни работи.
Конференцијата со воведен говор ќе ја отвори премиерот Зоран Заев, а на неа со свои говори и присуство ќе учествуваат поранешниот Грчки премиер Алексис Ципрас, Помошник државниот секретар за европски и евроазиски прашања во Стејт департментот на САД, Филип Рикер и заменик помошник Секретар во Бирото за Европски и Евроазиски работи во Стејт департментот на САД, Метју Палмер, екс шефицата за заедничката надворешна и безбедносна политика на ЕУ, Федерика Могерини, поранешниот генерален секретар на НАТО, Џорџ Роберсон , поранешниот специјален претставник на ЕУ, Ален ле Роа, поранешниот еврокомесар за проширување Јоханес Хан, турскиот министер за надворешни работи Мевлут Чавушоглу, заменикот министер за надворешни на Грција Костас Франгојанис и други. На претседателско ниво ќе бидат претставени Словенија и Црна Гора а на премиерско ниво, Србија, Албанија и Косово. Доаѓаат и 8 министри за надворешни работи.
На највисоко можно ниво ќе бидат претставени ОБСЕ и Советот на Европа, а тука се и генералниот секретар Марија Пејчиновиќ Буриќ, генералната секретарка на РСС, Мајлинда Брегу, генералниот секретар на РИКО, Алберт Хани и на Комитетот за демократии, Томас Гарет.
Во основата на Преспа форум дијалог се наоѓаат три столба: Охридскиот рамковен договор, Договорот за пријателството со Бугарија и Договорот од Преспа. Овие договори создаваат една нова, алтернативна слика не само за нас, туку и за регионот. На овие договори почива современиот политички и општествен наратив на земјава, кој, пак преставува одличен автентичен модел за успешна имплементација на современите вредности како што е соживотот, еднаквоста, слободата, солидарноста, инклузивноста, демократијата овде на Балканот, се наведува во соопштението од владината прес-служба.