Сите јавни претријатија во Охрид се ангажирани во расчистување на она што зад себе го остави невремето што вчера го зафати градот со ветер со брзина од над 90 километри на час, кое предизвика штета на повеќе места на крајбрежјето на Охрид.
Од Кризниот штаб се апелира да се тргнат автомобилите и да се регулира сообраќајот во стариот дел на Охрид за да може механизацијата непречено да работи на расчистување.
Доцна синоќа заседавал Кризниот штаб при што биле договорени конкретните активности на надлежните служби и нивна координација.
Констатирано е дека нивото на Охридското Езеро е на 693,78 метри и тоа е 3 сантиметри над дозволената кота од 693,75 метри. Силниот ветер од над 90 километри на час, предизвикал бранови во висина од 120 сантиметри. Кризниот штаб е во постојана комуникација со АД ЕЛЕМ, од каде велат дека кај Дрим се испуштаат по 20 метри кубни во секунда.
Екипите на јавните претпријатија цел ден биле на терен и расчисувале, а противпожарната единица имала осум интервенции на паднати оџаци.Најголеми оштетувања има на крајбрежните објекти на потегот од Канео до градскиот плоштад.
Од Кризниот штаб информираат дека правните и физичките лице кои се оштетени од невремето од утре ќе можат да поднесат барање за обештетување. Општинската комисија за проценка на штети од елементарни непогоди по пријава ќе излезе на терен.