Во рамките на фестивалот „Охридско лето“ вечерва во 19 часот во предворјето на црквата Св. Софија во Охрид ќе се одржи промоција на книгата „Боите на мојата музика“ од авторите Снежана Анастасова Чадиковска, истакната пијанистка, пијано педагог, публицист, музички аниматор и организатор и Марко Коловски, музиколог, публицист, новинар и општественик.
Книгата “Боите на мојата музика”, е приказна за животниот и творечкиот пат на истакнатата македонска пијанистка, Снежана Анастасова Чадиковска. Музичката јавност ја познава Чадиковска и како пијано педагог, музички публицист, аниматор и организатор на бројни културни и музички настани.
“Боите на мојата музика” е автобиографско дело, раскажано од Снежана во соработка со нејзиниот долгогодишен соработник, музиколог, но пред се и пријател, Марко Коловски.
Книгата започнува од раното детство на Снежана и првите среќавања со музиката, опишувајќи настани кои ја одбележуваат нејзината кариера, но и нејзиниот личен живот, се до добивањето на некои од највисоките национални признанија за културни, музички и педагошки достигнувања. Ова низа од лични спомени и децениски случувања, поткрепена со бројни фотографии, а опишани од аголот на уметникот и музиколог, Марко Коловски, ја збогатуваат националната музичко-културна архива, носејќи значење за македонската музичка и културна сцена, воопшто. “, информираат од организацијата на настанот.
За рамнодушност нема место додека трае читањето на ова дело. Примамливо зa секој, а особено за музички едуцираните читатели, овој приказ на креативноста, интуитивноста, амбицијата, упорноста и желбата на едно големо музичко македонско име, носи надеж дека ќе инспирира и мотивира многумина понатаму.
Книгата е колоритна, раскошна, блескава, а најдобар приказ за тоа е “Хипостази на животот” на ликовниот уметник Венијамин Хаџи – Наумов.
Промотори на книгата се Илинденка Петрушева, филмолог, филмски критичар, историчар на филмот, есеист и Александар Трајковски, музички теоретичар, истражувач, педагог и публицист. Модератор на промоцијата е Милчо Јованоски, директор на Националната установа Библиотека Григор Прличев, новинар и публицист а водител на настанот е
Наташа Попоска Карче, сликар, уметник, стоматолог. Книгата е во издание на Музичкиот издавачки центар а финансиски е поддржана од Министерството за култура и од Алкалоид Скопје.
По промоцијата следи Концерт на камерниот оркестар на Музичката Младина на Македонија (МММ) ,,Сашa Николовски – Ѓумар” со почеток во 21.00 часот во црквата Св. Софија.