Основното јавно обвинителство Скопје нема конкретен одговор на прашањето на НОВА, дали функционерот на ДУИ, Бекир Асани, досега бил повикан на разговор по инцидентот кој го предизвика во близина на „Мавровка“ кога полицајка им асистираше на пајак-службите да му го земе возилото поради непрописно паркирање.
На прашањето на НОВА, „Дали надлежниот јавен обвинител го повика на информативен разговор Бекир Асани?“, од ОЈО велат по известувањето од МВР и сослушувањето на полицајката, надлежен јавен обвинител издал барања и наредби за прибирање на податоци и дополнителна документација во насока на утврдување на фактите во предметот.
Од Обвинителство дополнуваат дека освен барањата за дополнителна документација, во исто време тие преземале и „други дејствија за прибирање на потребните податоци во предметот“.
Бидејќи оттаму велат дека се уште активно постапуваат по случајот и во тек е анализа на податоците, се уште нема јавнообвинителска одлука, туку таа допрва ќе биде донесена.
Инцидентот предизвикан од Асани се уште е предмет на реакција во јавноста, особено откако МВР соопшти дека тој само вербално ја нападнал полицајката, а таа пак, министерот Оливер Спасовски го информирала дека самата се повредила од „пајакот“.
Во моментот кога Бекир Асани ја нападнал полицајката, на крстосницата кај булевар „Гоце Делчев“ и улица „Филип Втори“, веднаш пристигнало засилување од уште неколку полицајци.
Во текот на денот, МВР соопшти дека Асани бил повикан на информативен разговор во Полициската станица Бит Пазар, а по исказот за него била поднесена прекршочна пријава за нарушување на јавниот ред и мир.
Досие Асани: Снимките од инцидентот во рацете на обвинителите
Неодамна, министерот Спасовски реагираше дека во случајот со инцидентот со Асани, ништо не се крие и дека целата документација била предадена во Јавното обвинителство.
Спасовски одговараше на новинарско прашање за време на посетата на Кавадарци, по коментарите во јавноста дека во случајот нешто се крие.
„Поднесена е целокупната документација до јавното обвинителство, тоа постапува и сите информации што се однесуваат на случајот ги имате таму. Тие податоци ќе ги добиете од Јавниот обвинител. Значи сите информации, податоци, се што е достапно за МВР е доставено во ЈО и се што ве интересира во поглед на оваа истрага која ја води обвинителството, ќе побарате информација од нив. Значи, се што имавме како материјал и како доказ е доставено до обвинителството и во рамките на истрагата која се води, сите информации можат да се најдат само во обвинителството“, рече Спасовски.