При обид градските служби да го подигнат возилото поради непрописно паркирање, лицето Б.А денеска кај „Мавровка“ нападнал полицајка. МВР го потврди инцидентот и соопшти дека работи на расчистување на случајот.

Официјална информација од МВР, дали тој бил приведен, засега нема.

Според полицијата, инцидентот се случил околу 10 часот на крстосницата од булевар „Гоце Делчев“ и улица „Филип Втори“. Тогаш специјално возило „пајак“ се обидело да подигне непрописно паркиран џип „ленд ровер” со скопски регистарски ознаки. Сопственикот на возилото Б.А. не дозволувал да го подигнат џипот, па вербално ја нападнал полициската службеничка, која била на местото на настанот. Бидејќи Б.А. агресивно се однесувал кон полициската службеничка, биле повикани и други полициски службеници на местото на настанот.

Дел од медиумите објавија дека се работи за Бекир Асани, висок функционер на ДУИ и поранешен претседател на партискиот огранок на партијата во општина Чаир.