Обвинителот Љубомор Лапе, кој го застапува обвинението за случајот „Тортура“, денеска во скопскиот Кривичен суд не предложи нови докази за случајот, откако скопска „единица“ претходно на закажаното рочиште за објава на пресуда го реотвори случајот. Според Лапе, нема начин како да се измери кој колку сила од полицајците употребил при апсењето на лидерот на Обединети за Македонија Љубе Бошкоски, туку тој имал душевно страдање од висок степен, нешто што го покажало вештачењето.
– Нема простор за предлжување нови докази, фактичката состојба е целосно утврдена. Oд друга страна секое понатамошно дополнително предлагање на докази од страна на обвинителството или на одбраната сметам дека би претставувало суштествена повреда, а осебно од страна на обвинителството, бидејќи би ни било дадено едно оружје плус, изјави обвинителот Љубомир Лапе.
Адвокатите на поранешниот директор на Управата за безбедност и контраразузнавање, обвинетиот Сашо Мијалков, како и на обвинетите припадници на тогашната полициска единица „Алфи“, реагираа дека наместо нови докази, од обвинителот Лапе во судница слушнале само негово мислење.
Претходниот месец скопскиот Кривичен суд наместо да донесе пресуда, донесе одлука за реотворање на случајот. Како причина наведоа дека не се утврдило кој од обвинетите колку сила употребил при апсењето на Бошкоски. По изнесувањето на одбраната на реотворениот судски процес повторно ќе се изведуваат завршни зборови, па дури потоа ќе се закаже рочиште за објавување на пресуда.