Основното Јавно Обвинителство (ОЈО) поднесе обвинителен акт за кривично дело злоупотреба на службена положба и овластување против директорот на Агенцијата за филм, кој во периодот од 21 јануари во 2016 година до 14 јуни во 2017 година, со искористување на својата службена положба и со пречекорување на границите на службеното овластување, за правното лице „Јадран Филм ДООЕЛ Скопје“ прибавила значителна имотна корист од 68.000.000 денари.
„Спротивно на член 18 од Законот за филмска дејност, таа незаконски раководела со постапката за избор, исплата на одобрени парични средства и надзор над производството на филмски проект – „Македонија“, играна серија од четири сезони“, соопштија од Јавно Обвинителство.
По објавен конкурс за финансирање проекти од национален интерес, на 21 јануари во 2016 година, се појаснува во соопштението, обвинетата дала предлог за избор на проектот „Македонија“, а ваквиот предлог бил прифатен од Управниот одбор на Агенцијата за филм. На 10 февруари во 2016 година, таа склучила договор со правното лице „Јадран Филм ДООЕЛ Скопје“ за финансирање на проектот во износ од 283.000.000 милиони денари без да обезбеди банкарска гаранција во висина од 25 проценти од износот на одобрени средства.
„Притоа, не биле приложени ниту потврда за обезбедени сопствени парични средства на „Јадран Филм ДООЕЛ Скопје“ во износ од 17.988.750 милиони денари, детален буџетски приказ со спецификација на планирани средства за реализација на секоја ставка по цена, количина и број, разработен план за снимање на серијата со наведено времетраење и локација, а не постоел ниту доказ за успешност, односно претходно продуцирани филмови од наведеното правно лице. Договорот бил склучен само врз основа на приложен концепт за серија наместо изготвено сценарио“, стои во соопштението.
На 26 октомври во 2016 година, обвинетата склучила анекс-договор со кој го намалила бројот на епизоди во првата сезона од 25 на 14. Ден подоцна, без претходно одобрение од Управниот одбор, се подвлекува во соопштението, склучила втор анекс-договор со кој дозволила однапред да се изврши исплатата на одобрени средства за првите две фази од воведната сезона на проектот во износ од 68.000.000 милиони денари, иако била обврзана исплатата да ја врши за секоја фаза одделно врз основа на претходно доставен и одобрен извештај за наменски потрошени средства со доказ за извршени исплати.
„На 23 ноември во 2016 година, обвинетата наложила исплата на износот, иако знаела дека „Јадран Филм ДООЕЛ Скопје“ не постапил по Договорот, односно воопшто не ја спровел првата фаза од проектот – развој и подготовка, не создал услови за отпочнување на снимањето, не ангажирал директор на фотографија, актери, монтажер, костимограф, сценограф, опрема за снимање и камермани. На 14 јуни во 2017 година, при постоење на истите околности, по претходна одлука на Управниот одбор, обвинетата склучила трет анекс-договор со кој го продолжила времетраењето за производството на првата сезона и со тоа и нанела значителна имотна штета на Агенцијата за филм“, соопштија од ОЈО.
Истражната постапка во овој предмет најпрво ја водеше ОЈО за гонење на организиран криминал и корупција, но во текот на постапката се утврдило дека станува збор за кривично дело злоупотреба на службена положба и овластување, па предметот бил доставен на надлежно постапување во Основното Јавно Обвинителство Скопје. По приемот на предметот, надлежниот јавен обвинител презел и дополнителни истражни дејствија, а по нејзино барање бил извршен и дополнителен распит на осомничената, по што до Основниот кривичен суд Скопје беше поднесен Обвинителен акт. За обвинетата во сила се претходно определени мерки на претпазливост.
За малверзации во случајот со серијата „Македонија“ пишуваше Нова ТВ на средината на минатиот месец.