Агенциите на Обединетите нации во Македонија се сериозно загрижени за условите во кои се наоѓаат бегалците кои останаа заглавени во државата. Во соопштението се вели:
„Поради постепеното заострување на критериумите за влез во земјата во февруари оваа година и конечното затворање на границите од Западниот Балкан за нередовно движење на 7 ми март 2016, група од околу 1.000 лица остана во државата, без можност да продолжи до својата конечна дестинација. Речиси сите се од Сирија и Авганистан. Во моментов, околу 770 лица се сместени во транзитниот центар Табановце на северната граница, а околу 138 престојуваат во транзитниот центар Винојуг, на јужната граница во Гевгелија.
Дополнително, 61 лице е во центарот за баратели на азил во Визбегово, каде што чекаат на одлуки за поднесените барања за азил, а дополнителни 12 ранливи поединци се сместени во куќа за згрижување во Скопје. Агенциите на Обединетите нации се сериозно загрижени поради условите во коишто живеат овие лица. Двата главни центри за сместување се проектирани, изградени и опремени исклучиво како транзитни центри, со можност за згрижување на минувачки посетители до најмногу 24 часа. Тие не се центри за престој.
Луѓето кои престојуваат во речиси празниот камп во Винојуг ги користат креветите на спрат во контејнерите, но во Табановце има недостаток од кревети и мнозинството луѓе кои престојуваат таму спијат на клупи, на подот во колективните засолништа, или надвор во шатори. Немаат приватност. Често снемува струја. Греењето кога надвор е студено и ладењето кога надвор е топло се несоодветни. Санитарните услови се примитивни. Слободата на движење е ограничена, што ги принудува луѓето да живеат во услови слични на притвор. Повеќето од луѓето во Табановце живеат во вакви услови повеќе од два месеца.
Владата, агенциите на Обединетите нации и невладините организации направија големи напори за да ги приспособат центрите на новите потреби, но тие се сè уште несоодветни за подолг престој. Условите во центарот во Визбегово за барателите на азил се исто така незадоволителни. Лицата таму добиваат неквалитетна храна и во недоволни количини; хигиената е на ниско ниво; нема топла вода; нема реквизити и можности за рекреација; и пристапот до информации е несоодветен. Ваквите лоши услови особено загрижуваат поради високиот број ранливи и кревки лица помеѓу бегалците и мигрантите во земјата.
Профилирањето на поединци коешто неодамна го спроведе УНХЦР покажа дека жените и децата претставуваат повеќе од две третини од целата група. Вкупно 28 жени се бремени, четири се во деветиот месец на бременоста, а 32 мајки дојат. Меѓу бегалците 187 од вкупно 517 деца се под петгодишна возраст, а во групата луѓе кои се во моментов сместени во Табановце има и неколку новороденчиња родени во изминатите два месеца. Таму има 49 самохрани родители кои патуваат со децата. Има 26 лица со попреченост, а 127 страдаат од сериозни здравствени состојби.
Сите овие лица имаат специфични потреби во врска со кои во моментов речиси и да не се постапува. Ваквите тешки услови дополнително го зголемуваат и така високиот ризик од сексуално и родово насилство, особено каде што неизвесноста, наметнатата неактивност и материјалните ускратувања доведуваат до фрустрација. На жените и девојчињата кои се соочуваат со ризик од експлоатација и трговија со луѓе треба да им се обезбеди дополнителна заштита.
Агенциите на Обединетите нации бараат од Владата да преземе итни мерки за да ја подобри оваа ситуација, а конкретно на бегалците и мигрантите да им понуди сместување кое е соодветно за подолгорочен престој. Агенциите на Обединетите нации се подготвени да обезбедат и техничка и финансиска поддршка за изнаоѓање решенија кои ќе понудат поголемо почитување на човечкото достоинство и дополнителна заштита за големиот број ранливи лица.
Обединетите нации го препознаваат огромниот предизвик со кој се соочува државата поради големиот транзит на мигранти и бегалци. Истовремено, тие имаат целосна доверба дека државата е целосно способна да обезбеди похумани услови за 1.000 бегалци и мигранти кои се во моментов сместени во центрите за транзит и азил. Агенциите на Обединетите нации ја потврдуваат нивната подготвеност да ги поддржат државните власти и партнерите од невладините организации во овој напор да се излезе во пресрет на основните потреби и да се заштитат човековите права, се вели во соопштението од Агенциите на ОН во Македонија.