Момчето Марко кое вчера се онесвести на пресот на лидерот на ВМРО-ДПМНЕ, Никола Груевски, е истото кое пред неколку месеци прогонуваше новинари и јавни личности и вербално ги напаѓаше, а сето тоа го снимаше со камера. Младото момче го препозна новинарот на НОВА ТВ, Борјан Јовановски, кој во март годинава беше нападнат во скопскиот ресторан „Воденица“. Тој прво го нарече Јовановски предавник, а потоа го плукна и замина. Додека се случуваше сево ова, друго момче го снимаше инцидентот.
https://www.facebook.com/MilenkoNedelkovskiDnevnik/videos/1652946164722400/
„Марко, младото момче кое е на слика со претседателот на ВМРО ДПМНЕ е истата личност која во месец март влета во ресторанот Воденица за да ми го пренесе ставот на партискиот врв. Жалам за Марко кој очигледно својата младешка енергија ја ставил на располагање на дневната политика на најпримитивен можен начин, но тоа мислам дека е проблем на неговото семејство. Она што мене ме загрижува е што во 21 век имаме политичка структура која при остварувањето на своите цели не бира никакви средства и злоупотребува млади луѓе на најпримитивен начин. Навредата која ја доживеав е навреда која стига од многу конкретна адреса- лично на лицето Никола Груевски кој на својот ФБ профил се гордее со таквата младина“, вели новинарот Јовановски.
Јовановски во март инцидентот го пријави во полиција, а утрово повторно се обрати во МВР за да го потврди идентитетот дека се работи за истото лице. Во првиот случај како насилник, а вчера како „онесвестено“ младо момче од ВМРО-ДПМНЕ.
На вчерашната прес конференција на Груевски, во еден момент на Марко му се слоши и паѓа на земја, но никој од неговите сопартијци не реагира, а лидерот продолжува да зборува. Момчето многу брзо се опоравува и станува и потоа се тргнува од пултот. По неколку часа претседателот на ВМРО-ДПМНЕ објави слики со Марко на неговиот Фејсбук профил каде напиша:
„Марко беше во право дека успеал да го засени пресот на Заев пласиран кај некои провладини медиуми за 100 дена влада каде што не слушнавме ниту еден проект. На прес конференцијата не приметив, но потоа лично се уверив, вистинскиот борец, младиот Марко е во добра состојба и одлично расположение. Одиме напред заедно во нови победи!“
Во периодот кога беше нападнат Јовановски, на тапет беа повеќе јавни личности кои беа таргетирани од поранешната власт како Љубомир Фрчкоски, Владимир Милчин, Златко Ориѓански, Бранко Тричковски.
Инцидентот во март не беше прв напад на Борјан Јовановски. Пред две години непознато лице се појави пред семејната куќа и на неговата сопруга и остави мртовечки венец со натпис „последен поздрав“ велејќи дека „поздравот„ е од Тодор Александров. И овој случај е пријавен во полиција.