Градежен инспектор на скопската општина Центар издаде решение со кое му наредува на инвеститорот на доградба на локал на улица „Македонија“ да ја отстрани истата и да го врати локалот во првобитна состојба.
Станува збор за доградба на локал на улица „Македонија“ на парцела која е земјиште во сопственост на државата.
Инспекторот изврши увид, состави записник, по кој сопственикот беше повикан во општината да ја достави потребната документација на увид. Откако сопственикот не се појави во општината, градежниот инспектор донесе решение за уривање на градбата, соопштија од Центар .
Доколку сопственикот на објектот не ја отстрани доградбата на локалот во законски зададениот рок, истата ќе биде административно извршена и отстранета.
Општина Центар упати апел до сите инвеститори и сопственици на нелегални објекти и доградби, да постапуваат по издадените решенија за отстранување на објектите. Во спротивно, општината присилно ќе ги отстрани, со што трошоците за отстранувањето ќе паднат на товар на инвеститорите, односно сопствениците на нелегално поставените објекти.