РИБАРО
Унгарскиот премиер Виктор Орбан кој на лепе очи му вети на Мицкоски 500 милиони евра кредит, како што дознава АХА, за возврат побарал да се изгради резиденција за него на скопското Кале, одма до американската амбасада.
Тоа го побарал Орбан од Мицкоски при неговата тајна посета на Скопје, а како што прецизираа изворите, било еден и од условите за евентуално да се разговара за втората бранша од позајмицата која би вредела дополнителни 500 милиони евра, јавуваат изворите на АХА.
„Вие со овој заем што ви го давам и практички сте ми вазали. Крал не може да ме ставите, оти нели срамота е, ама има да ми изградите резиденција на Калето одма до американската амбасада. Треба да се знае кој е газда во оваа држава. Објектот треба да биде поголем од нивниот и по површина и по висина. Може и на местото од оној музејот на современа или како ви се вика тој убав објект. Одберете, почнете да градите и се надевам дека до вашите локални избори ќе се гледа крајот на изградбата. Пред локалните пак ќе ви требаат пари да замачкате што се испокрале вашите градоначалници, па затоа до тогаш ви е рокот. Берете ум!“, му порачал Орбан на премиерот на Нашата земја, Христијан Мицкоски, дознава АХА.
– Ама Викторе, не случајно е одбрана таа локација за америчка амбасада. Ќе ме качат Америте на машко магаре, ако го направам тоа, рекол Мицкоски.
– А, повеќе сакаш јас и другарчето од Кремљ да те качиме на машко магаре? Што мислиш, од каде се овие пари?, го прашал Орбан.
– Ене, онде е вистинската локација, Засега на местото од македонското, ставете унгарско знаме на тврдината, посочил Орбан при тајната посета на Калето.
Рубриката АХА! е простор за хумор и сатира. Секоја сличност со реалноста е намерна и не е претерана.
FRONTLINE.MK