Операционите сали на Клиниката за ортопедија и денеска останаа затворени.  Оваа информација ја потврдија и лекарите и пациентите на клиниката. Болните кои се хоспитализирани се жалат дека непотребно  престојуваат и чекаат цела недела за операција, а никој не им кажува кога ќе бидат отворени операционите сали.

НОВА дознава дека уште во септември Санитарната и здравствена инспекција издала наредба на Клиниката за ортопедија да ги реновираат операционите сали, но бидејќи тоа не било направено, рокот бил пролонгиран до декември. Но, раководството на клиниката не го испочитувало ниту тој рок.  Причината за тоа, како што велат инспекторите, е во тендерот кој никако не може да се реализира.

„Ова решение се однесува на две операциони сали. Заради тендерската постапка тој рок е продолжен до декември, но заради нереализирање на тендерот, салите уште не се реновирани“, велат за НОВА од Санитарната и здравствена инспекција.

Економскиот директорот Александар Стаменковиќ и понатаму тврди дека операционите сали не се затворени и дека се одвива редовна оперативна програма.  Тој се правда дека клиниката останала без лекови поради лошата комуникација меѓу раководителот и клиничката аптека, а тој нарачките ги потпишал на време.

„Ве известувам дека фактите кои ги изнесувате во вашите статии се неточни и не одговараат на реалната ситуација. Уште еднаш ве известувам дека станува збор за интерен комуникациски проблем меѓу в.д раководителот на организациската единица и одделението за аптека кој предизвикал погрешна интерпретација во рамки на посочената организациска единица. Нема непотпишани нарачки од моја страна, а снабдувањето со медицински материјали с е одвива редовно и согласно потребите“, се вели во одговорот на директорот Стаменковиќ.

Дека ситуацијата била многу драматична и постоело опасност да бидат откажани операциите на сите хируршки клиники покажува и  Записникот од Стручниот колегиум кој го објави НОВА.

Стаменковиќ не одговори што се случува со тендерот за реновирање на операционите сали. Зошто не се постапува според Решението на Санитарната и здравствена инспекција за реновирање на салите. НОВА уште во октомври објави фотографии за катастрофалната состојба на операцините сали. Тогаш беше најавено дека постапката за тендерот ќе биде завршена во ноември. До ден денес тендерот се уште не е реализиран.

Нејасно е и зошто нема ништо од тендерот за вештачки колкови, колена, штрафови, протези и друг медицински материјал поради што на клиниката веќе цела година се редуцирани или не се прават ваков тип на операции.

Во Министерството за здравство велат дека овие тендери треба да ги реализира самата клиника и тие не се во нивна надлежност.