За три месеци осигурителните компании исплатија речиси 23.000 отштетни побарувања. Најголем раст на вредноста на исплатени штети за покривање медицински трошоци има кај приватното здравствено осигурување, а најголем процентуален раст има кај исплатите за штети покриени со патничко осигурување. Исплатите во најголемата доброволна класа – осигурување имот пораснаа за 17 отсто во споредба со истиот период лани, покажуваат официјалните податоци на Агенцијата за супервизија на осигурување.
Единаесет осигурителни компании за неживотно осигурување исплатија околу 16 милиони евра за настанати штети на свои осигуреници во првите три месеци годинава. Во првите 90 дена годинава осигурителните компании исплатиле речиси 23.000 штети на осигуреници и тоа е 30 отсто повеќе од истиот период 2021 година.
Најголемо учество во структурата на исплатените штети очекувано има најголемата осигурителна класа – задолжително автомобилско осигурување кое е обврзувачко со закон, при што се исплатени околу 7,7 милиони евра и тоа е 48 отсто од вредноста на сите штети платени во овој период. Во споредба со истиот период лани вредноста на исплатените штети е зголемена за 4 отсто.
Најголем раст на вредноста на исплатените штети повторно има кај приватното здравствено осигурување. Осигурениците наплатија 1,4 милиони евра трошоци за медицински прегледи и лекување за период од три месеци. Тоа е за 94 отсто повеќе од истиот квартал минатата година. Од почетокот на корона кризата пред две години ова е најбрзорастечки осигурителен производ.
Значаен за истакнување е растот и на исплатените штети кај осигурувањето имот. До крај на март годинава се исплатени речиси 1.800 отштетни побарувања за осигуран имот во вредност од 1,9 милиони евра. Тоа се 17 отсто повеќе исплатени средства во однос на истиот период 2021 година. (Р.Н.)