Основниот суд во Косовска Митровица синоќа ги ослободи двајцата полицајци кои беа уапсени пред два дена под сомнение дека не го заштитиле местото на убиството на Оливер Ивановиќ, објави „Коха диторе“.
Веста за весникот ја потврди и главниот обвинител на Основното обвинителство во Митровица, Шуќри Суља.
Обвинителството вчера побара од судот едномесечен притвор за осомничените.
Весникот „Газета експрес” претходно објави дека двајца припадници на косовската полиција, Д.М. (48) и Ж. Ј. (48), од станицата во северниот дел на Косовска Митровица, биле уапсени под сомневање дека не го заштитиле местото на убиството на Оливер Ивановиќ.
Оливер Ивановиќ, лидер на Граѓанската иницијатива на СДП, беше убиен на 16 јануари пред седиштето на партијата во Северна Митровица.
Обдукцијата покажа дека тој бил убиен со шест куршуми од пиштол М70А.