По вчерашниот тежок ден на аеродромот во Кабул поради бројното цивилно население кое што беше околу самата писта, синоќа околу еден часот по полноќ аеродромот беше ставен во функција и евакуацијата беше започната, изјави Министерот за надворешни работи, Бујар Османи.
Според него, повеќето од евидентираните 75 македонските државјани се евакуирани од Авганистан.
– Утрово околу 4.30 часот првите наши граќани кои што вчера беа на аеродромот во Кабул, слетаа во Доха и се очекува наскоро истите да бидат транспортирани во Кувајт. Натамошниот нивен транспорт кон земјава е неспорен и тие се безбедно надвор од Аганистан, рече Османи.
Малку подоцна, како што рече, во Абу Даби во Дубаи слета и вториот авион, каде што според последните информации се наоѓаа 25 наши граѓани и нивниот пат продолжува за Лондон.
– Дополнително утрово се упатени 19 наши државјани кои вчера беа сместени во базата на НАТО и тие веќе исто така се на пат за Доха каде наскоро треба да слетаа, додаде Османи.
Во Кабул се уште 14 македонски државјани од кои 11 денеска ќе бидат трансферирани на аеродромот за да бидат евакуирани во текот на денов, а двајца се изјасниле дека остануваат во Авганистан и подоцна ќе ја напуштат земјата.
Османи потенцира дека во сите овие места и градови каде се упатуваат нашите граѓани активирана е дипломатската мрежа со цел да се асистира ако се појават некои предизвици на нивниот пат кон дома.
Тој додаде дека МНР продолжува и понатаму да ги следи состојбите на терен, и очекуваат дека сите наши граѓани ќе бидат извлечени и безбедно ќе се вратат дома. Сепак остануваме подготвени за секакво сценарио со отворени алтернативни можности од нашите пријателски земји за евентуална вонредна евакуација на нашите граѓани.
На прашањето кога се очекува нашите граѓани кои се враќаат од Авганистан да пристигнат во земјава, Османи истакна дека тоа зависи од распоредот на нивните летови.
– Дали ќе има потреба од карантин, тоа ќе зависи од нивниот вакцинален статус и други епидемиолошки карактеристики. Од Комисијата за заразни болести и Министерството за здравство во Владата е формирано Координативно тело во кое се вклучени и министри кои покриваат прашања од овој домен и кое ќе одлучува согласно ситуацијата, додаде Османи.
Како што е познато во вчерашните нереди загинаа најмалку 7-мина, од кои тројца на бизарен начин, паѓајќи од авион кој штотуку полета.