„Мене ми е важно да утврдиме дали има политичка волја кај Софија за надминување на прашањето, пред да пристапиме кон конкретни прашања и документи. Засега не гледам политичка волја, во моментот кога ќе видиме политичка волја ќе пристапме кон разговорите“, изјави вечерва шефот на дипломатијата Бујар Османи во интервју за Телма.
На прашањето дали францускиот предлог е правен зад грбот на македонското државно раководство, Османи не даде директен одговор.
„Бевме во комуникација, претставници на француската влада доаѓаа во Скопје, цело време се разговараше, но предлозите што ги ставаат на маса се нивни одлуки. Немам коментар на таквите предлози и идеи, прво треба да видиме дали има политичка волја кај Софија, не сакам претходно да ги изложам нашите позиции, ниту сакам да бидеме алиби во пресрет на бугарската дебата. Ќе се вклучиме откако тие ќе ги дадат своите ставови“, нагласи министерот Османи.
Тој појасни и дека дел од билатералните прашања се веќе во преговарачката рамка, бидејќи таму има параграф во кој се вели дека ќе се оценува спроведувањето на договорите за добрососедство со Бугарија и Преспанскиот договор со Грција.
„Повеќето од тоа што го слушаме во јавноста се неточни информации и шпекулации. Политичките партии не треба да ловат поени по тоа прашање. Ги комуницираме нашите ставови и со француското претседателство, и со земјите членки, но зазедовме став да не коментираме додека не видиме дали има политичка волја во Софија да се надмине тоа прашање.
Османи подвлече и дека историските прашања не може да бидат бенчмаркови, а во однос на македонскиот јазик рече дека португалскиот предлог е добра основа за надминување, и потенцираше дека нема да прифатат преквалификација на македонскиот јазик во преговарачката рамка, односно во ЕУ треба да биде запишан нашиот македонски јазик без никакви додавки или фусноти. (С.К.)