Шефот на Општинскиот изборен штаб во Чаир на ДУИ Бујар Османи денеска оцени дека ДУИ е апсолутен победник на овие избори меѓу албанските партии.
-ДУИ е прва победничка партија во Чаир за советници, таму каде нема коалиции. Ја примивме пораката на претходните избори и понудивме нов лик. На Чаир не му треба кандидат што ќе биде од другата страна на Владата. Секој вид на договор на тргување на гласовите како контингенти се неприфатливи за гласачите и тоа ќе го покажат на 29 октомври, изјави Османи.
Тој рече дека коалициите се прават врз основа на комплементарноста на идеите, а не на договори за контингенти гласови и дека коалицијата на ДУИ и СДСМ во Чаир и Скопје се темели врз основа на заеднички програмски заложби и беше јавна, а од друга страна имаме тајни коалиции и контингенти на гласови кои се даваат меѓу партиите што идеолошки не се поврзуваат.
Во врска со најавите за коалиција меѓу Села и Касами, во ситуација кога Села е владин партнер, Османи одговори дека се работи за коалиција меѓу опозициски партнери и дека има шпекулации за коалицирање и со македонски партии, а сето тоа ќе биде решено заеднички со коалициските партнери кои треба да седнат и да се договорат.