Вицепремиерот Бујар Османи коментирајќи го Законот за употреба на јазиците рече дека Македонците не треба да се чувствуваат загрозени од овој Закон, затоа што нема да има ниту еден документ во службена употреба во кој ќе го нема македонскиот јазик.
„Законот ќе овозможи граѓаните да комуницираат со државата на свој јазик, да можат да се разбираат. Кога имате граѓани кои ја разбираат државата и државата ги разбира нив, имате интегрирани и лојални граѓани. Ова само ќе ги зближи Алабнаците со државата“ рече Османи.
Тој денеска ги потпишал првите документи на два јазици, и кажа дека побарал странска помош за логистика, но и за да се соберат искуства од други држави каде што се применува двојазчиност или тријазичност.
Во однос на реакциите по објавувањето на фотографијата со лидерот на ДУИ, Али Ахмети, каде што симболизираат двоглав орел, Османи вели дека тоа е знак на идентификација дека е Албанец.
„Двоглавиот орел значи порака јас сум Албанец. И тоа е знак на идентификација, ако некому му пречи дека јас јавно се изјаснувам дека сум Албанец, тоа е негов проблем, не мој. Демантирам дека тој знак рефлектира националистички и големоалбански претензии. Кога ќе бидете на Монт Еврест и го правите тој знак, тоа значи дека сте Албанец. Тоа е знак на моето знаме и ако тоа знаме е службено во употреба во Република Македонија и двоглавиот орел е во службена определба и тоа е моето право да се самоидентификувам во согласност со член 48 од Уставот, кој вели дека државата гарантира слобода на самоидентификација на граѓаните од етничките заедници“, рече Османи.