Вицепремиерот за евроинтеграции Бујар Османи денеска на прес конференција со министрите Спасосвки, Димитров и Шеќеринска рече дека не бил злоупотребен ниту еден денар во ПИОМ и дека министерката за труд Царовска имала „несреќана изјава со која отворила можност за спектакуларни шпекулации“.
Османи кажа и дека побарал од министерката Царовска и од одговорните во ПИОМ денеска да објаснат дека парите не биле распределени поради административни пречки или поради немање пари во буџетот затоа што претходната Влада одлучила да ги зголеми пензиите.
„Не станува збор за никаква злоупотреба и затоа побарав од министерката и од ПИОМ да објаснат и верувам дека тоа го направиле, зашто се работи за фејк њуз“ рече Османи.
Тој побара и извинување од сите политички партии и медиуми кои ја инволвирале ДУИ, во спротивно најави тужба.
„Поради штетата што е направена на ДУИ најавувам дека за сите политичари, политички партии и медиуми кои вчера ја инволвираа ДУИ во оваа лажна вест, дека ако не се извинат во наредните 24 часа ќе мора да покренеме правна постапка за да ја докажеме вистината“ рече Османи.
Вицепремиерката Радмила Шекеринска, за овој случај рече дека злоупотреба е направена, но тоа не значи дека парите завршиле во приватни џебови на функционери.
„Таа злоупотреба мора да се истражи бидејќи тоа беше модел на тогашната влада, практично да зема пари од луѓето кои дел од средствата ги вложуват во вториот пензиски фонд, меѓутоа заради дупките што ги создаваат во државниот пензиски фонд, практично ги прикриваа и ги пополнуваа со пари што требаше да одат во приватните фондови“ рече Шекеринска.
Од денеска започна обештетувањето на идните пензионери на кои со години не им биле уплаќани пари во вториот пензиски фонд.
