„Очите на 18 милиони луѓе се вперени во Софија каква одлука ќе донесе за почеток на преговори на Северна Македонија и Албанија со ЕУ. Мислам дека граѓаните на Бугарија не сакаат да бидат кочничари на европската иднина на 18 милиони луѓе бидејќи тоа веќе не е ни прашање дали Северна Македонија ќе почне преговори, туку дали Западен Балкан ќе има европска перспектива“, рече претпладнево шефот на дипломатијата Бујар Османи на прес-конференцијата во Скопје со хрватскиот колега Гордан Грлиќ Радман.
„Во рацете на Република Бугарија, земја која што во 2018 година ја врати европската агенда на Западен Балкан преку самитот во Софија, потоа ја запечати таа агенда Загреб преку нивното Претседателство, во нивни раце е дали сега во Софија ќе се погребе таа перспектива на Западниот Балкан“, подвлече Османи.
Тој додаде дека се надева дека бугарските политичари ќе се издигнат на нивото на задачата што ја имаат и нема да дозволат во Софија да се изгради споменик на гробот на најуспешната политика на ЕУ во последните 75 години а тоа е политиката на проширување.
Хрватскиот министер Гордан Грлиќ Радман повика на зголемено присуство на ЕУ на Западен Балкан на начин што ќе ги почне преговорите со Северна Македонија и со Албанија.
„Присуството на ЕУ е знак дека е тоа простор на ЕУ. Отворањето преговори со Северна Македонија е добар психолошки и важен момент и за граѓаните кои чекаат 17 години тоа да се случи. Северна Македонија направи се што е потребно, направи голем напредок во однос на останатите земји од Западен Балкан, спроведе реформи, граѓаните се проевропски и треба да се отвори ново поглавје на европската перспектива“, рече хрватскиот министер за надворешни работи и европски прашања. (С.К.)