Министерот за надворешни работи Бујар Османи, се сретна со неговиот словенечки колега Анже Логар денеска во Братислава. Логар кажа дека Словенија ќе се посвети на Западен Балкан за време на нивното претседавање со ЕУ во втората половина од годинава.
„Имавме квалитетен разговор со мојот колега, мислам дека е завршена добра работа за време на португалското претседателство, и го информирав колегата дека за време на нашето претседавање, Словенија ќе биде фокусирана многу околу Западниот Балкан“, рече Логар.
Османи рече дека и сега се работи напорно за јунскиот самит, иако има уште малку, но доколку не се успее, добра работа е што Словенија е следен претседавач.
„Задоволство е да се видам министерот за надворешни работи на Словенија, следниот претседавач со ЕУ. Ја искористив можноста да ја презентирам состојбата со нашиот почеток на преговорите, дека работиме напорно и за следниот самит на ЕУ во јуни, иако останува уште многу малку време, работиме и билатерално со Бугарија, но и во рамки на ЕУ зборувајќи за македонскиот предлог. Доколку не успее, има една среќна околност, доколку не успее, а тоа е дека следен претседавач е Словенија, силен пријател на Република Северна Македонија но и голем познавач на регионот“, рече Османи.