Адвокатот Костиќ го раскина договорот со Генералниот секретаријат на Владата, тештата на Рашковски се повлече од Комисијата за жалби во Централниот регистар, а хонорарот од Телеком Рашковски го донирал во хуманитарни цели, велат за НОВА ТВ владини извори. Овие одлуки доаѓаат откако ВМРО-ДПМНЕ и медиумите го обвинија владиниот генерален секретар, Драги Рашковски, за непотизам и судир на интереси.
Адвокатското друштво Костиќ, Велковски и Цветаноска, кое беше ангажирано од Генералниот секретаријат за правни услуги денеска го раскинало договорот. Адвокатот Костиќ, како причина за раскинување на договорот навел дека овој ангажман од Владата му нанел штета на угледот на неговата фирма и лично на генералниот секретар, Драги Рашковски.
„Во однос на обвинувањата за непостички однос во склучување на Договорот, навистина жалиме за изнесените невистини кои вам ви предизвикаа непријатност. Ве информираме дека веќе имаме поднесено тужби за клевета против сите говорници кои држеа прес конференции од ВМРО-ДПМНЕ. Затоа до вас го поднесуваме овој предлог за спогодбено раскинување на договорот за соработка. Сметаме дека нема ниаков проблем во однос на тоа, со оглед на фактот дека досега немаме наплатено никакво побарување и немаме ненаплатени побарувања“, пишува во дописот од Костиќ до Рашковски. 
кликнете на документите за поголема верзија
ВМРО-ДПМНЕ го обвини Рашковски за непотизам, бидејќи тој и адвокатот Костиќ се долгогодишни пријатели. А, НОВА ТВ откри дека адвокатското друштво било формирано пред неполни два месеца, на 27. јули годинава, а по само неколку дена било ангажирано од повеќе државни институции за адвокатски услуги.
Сепак, од Владата велат дека Костиќ и покрај тоа што имал склучено договор со Генералниот секретаријат, адвокатот оттаму нема земено ни денар, бидејќи од Владата досега не бил ангажиран ниту за една услуга.
Освен раскинувањето на договорот со адвокатското друштво, од функцијата се повлекла и мајката на сопругата на Рашковски, Елена Начевска, која како што објави НОВА ТВ, со одлука на Владата беше именувана за претседател на Комисија во Централниот регистар. Таа својата оставка ја депонирала во понеделникот.
Комисијата, за чиј претседател беше именувана Начевска, е второстепена Комисија која постапува по жалби во Централниот регистар. Назначувањето на Начевска за член на Комисијата, од Владата го правдаа со фактот дека таа работи во Основниот суд Скопје 20 години, а за овој дополнителен ангажман не следувало хонорар.
Последната афера врзана со генералниот секретар Рашковски, беше неговото именување за владин претставник на Собранието на акционери на Телеком за чиј ангажман му следува хонорар од 500 евра по седница. Телеком свикува собрание еднаш годишно, а по неодамна одржаната седница хонорарот кој го добил оттаму Рашковски го донирал за лекување на дете болно од леукемија.
Драги Рашковски на позицијата генерален секретар на Владата дојде од Правниот факултет „Јустинијан Први“ каде беше вработен како професор. Тој има три магистратури и два докторати на тема „Остварување на формите на непосредна демократија со помош на информатичката технологија“ и „Дигитализација и автоматизација на комуникацијата на граѓаните со јавната администрација.
Функцијата генерален секретар ја добива како близок пријател со премиерот Зоран Заев и човек од негова доверба.