Продлабочување на политичката криза, атмосфера на заплашување на избирачите во комбинација со страв од одмазда од страна на државните претпријатија и институции, неопходни суштински реформи во медиумите, контра-протести, влошување на политичката клима со одлуката на претседателот за аболиција на 56 лица кои се под истрага или осомничени за вмешаност во скандалот со прислушкувањето…
Ова е само дел од критиките кои денес ги објави набљудувачката мисија на ОБСЕ/ОДИХР за изборите што требаше да се одржат на 5 јуни. И покрај нивното откажување, подготовката на изборите и целокупната ситуација во Македонија беа предмет на извештај на набљудувачката мисија на ОБСЕ/ОДИХР објавен денес.
ОБСЕ/ОДИХР бележи дека “набљудувачите на ОБСЕ/ОДИХР добија веродостојни наводи за притисок врз вработени во јавниот сектор да присуствуваат на контра-протести, вклучувајќи и закани за отпуштање од работа”.
Според извештајот Државната изборна комисија (ДИК) работела во атмосфера на политички тензии поради целокупната состојба и добивала критики од опозицијата и НВО кои барале изборите да бидат одложени. Сепак, извештајот има и критики за работата на ова тело. ДИК одржувал затворени состаноци иако законот предвидува тие состаноци да бидат јавни а не била ни редовно ажурирана интернет страната на ДИК. Освен тоа, процесот на регистрација на гласачите бил хаотичен.
Извештајот содржи цела серија препораки. Така ОБСЕ/ОДИХР како еден од приоритетите препорачува Државната изборна комисија и МВР да продолжат да го прочистуваат избирачкиот список пред да се одржат наредните избори.
Потребна е исто така целосна транспарентност на целиот изборен процес со пристап на сите политички партии и граѓанското општество во проверката на изборниот список. Само така, според ОБСЕ/ОДИХР ќе се зголеми довербата на граѓаните во избирачкиот список.
Во однос на заплашувањето на гласачите ОБСЕ/ОДИХР бара власта да ги охрабри граѓаните да пријавуваат случаи на притисок и заплашување а потоа сето тоа треба да го истражат задолжените институции.
Медиумите се исто така предмет на анализа на овој извештај. ОБСЕ/ОДИХР смета дека е потребно да продолжат реформите во медиумите. Нивната слобода не не се подобрува. Медиумите трпат политички притисок а ОБСЕ/ОДИХР добила информации дека владата правела свој избор на кој медиум ќе му даде владини реклами а нив ги добивале медиумите кои «позитивно известувале» за активностите на власта.
Во однос на МРТВ извештајот препорачува да се донесе законска одредба со која оваа медиумска куќа ќе може балансирано и незвисно да ја покрива изборната кампања а сите политички партии да го добијат точното време за пренесување на нивните пораки до граѓаните преку овој јавен сервис.