Здружението на новинари на Македонија (ЗНМ) и Самостојниот синдикат на новинарите и медиумските работници (ССНМ) најостро ги осудуваат јавните објави на поранешниот уредник на една национална телевизија, Драган Павловиќ Латас, кој во изминатите денови преку приватна страница на социјалната мрежа Фејсбук таргетира новинари од неколку медиуми, злоупотребувајќи приватни фотографии од нивните профили и користејќи ги во своите објави.
Меѓу таргетираните медиуми се Истражувачката репортерска лабораторија (ИРЛ), 360 степени, БИРН Македонија, како и други организации кои работат на заштита на човековите права.
Во неговите објави, Латас пласира неосновани обвинувања и теории на заговор, чија цел е дискредитација на новинарите и медиумите што професионално информираат за релевантни општествени прашања. Оваа стратегија на таргетирање и јавно стигматизирање на новинарите, кои добиле признанија на национално и меѓународно ниво за својата работа, во мандатите на различни влади, претставува сериозен напад врз слободата на изразување и независното новинарство во државата, велат ЗНМ и ССНМ.
Посебно загрижувачки е што ваквата реторика не само што поттикнува говор на омраза, туку и доведува до сериозни закани кон новинарите, при што новинарките стануваат посебна мета на сексистички и мизогини напади во коментарите под објавите на Латас, предупердуваат тие.
„Ова се ороспии, нема работа од нив“, „овие не се човек да ги коментира, може човек да ги види и на паркинг плац кај камионџиите“, „Мислам дека за брзо ќе има уништување на документи или подметнати пожари во просторииве на платениве курветини..“, „и тие да изгорат со документите, најдобро ќе биде!“, се само дел од коментарите.
И Женската медиумска мрежа „Еднаква“ најостро ги осуди неоснованите обвинувања на Драган Павловиќ Латас изложени на социјалните мрежи против колешките Сашка Цветковска и Деница Чадиковска со цел да го наруши нивниот интегритет и да ја дискредитира нивната работа.
Женската медиумска мрежа „Еднаква“ ја осудува и објавата на Ивона Талевска на социјалните мрежи со која ги таргетира Сашка Цветковска и Славица Арсова.
Женската медиумска мрежа „Еднаква“ ги повикува надлежните институции да обезбедат заштита на новинарките од вознемирување и закани, и ја повикува јавноста да ги отфрли дезинформациите. Нападите врз новинарките се сметаат за напад врз службено лице со последните измени на Кривичниот законик.