Кристијан Панучи (45) повеќе не е селектор на фудбалската репрезентација на Албанија. Поранешниот репрезентативец на „аѕурите“ доби отказ што е образложен со лоши резултати, а незадоволството кај Федерацијата на западниот сосед кулминира по поразот од Турција (0:2) на домашен терен во квалификациите за ЕП 2020.
Панучи го презеде кормилото на албанскиот национален тим во минатото лето. На позицијата го наследи сонародникот Џани де Бјаси под чие водство репрезентација дебитира на Европските првенства во 2016 година.
Албанија со Панучи на клупата одигра 15 натпревари во кои забележа четири победи, два нерешени исхода и девет порази. Италијанецот како менаџер претходно работеше во Ливорно и во Тернана и беше асистент на Фабио Капело во стручниот штаб на репрезентацијата на Русија во периодот од 2012 година до 2014 година.
Како активен фудбалер играше за Рома, за Парма, за Интер, за Милан, за Монако, за Реал Мадрид. За селекцијата на Италија настапи во 57 меча и постигна четири гола.