Истражувачи од британскиот Универзитет Оксфорд заедно со научници од африканската држава Буркина Фасо стигнаа до неверојатно откритие: вакцина против маларија која има многу повисока ефективност од сите вакцини до сега откриени против оваа смртоносна болест. Новата вакцина, која се тестираше на група од 450 деца во Буркина Фасо, покажа одлични резултати кога научниците направиле повторна проверка по 12 месеци. Во оваа група вакцината покажала ефикасност од 77% што е многу повисока отколку сите други вакцини кои до сега биле развиени против оваа болест.
На пример, вакцината што беше дистрибуирана како дел од пилот програмата за парцијална имунизација на деца во африканската држава Малави во 2019 покажа само околу 40% ефективност. Исто така сезонската вакцина RTS,S/AS01 која се дава на луѓе кои патуваат до места каде има маларија има слични нивоа на ниска ефикасност: три дози, заедно со засилувач, имаат скромна ефикасност од околу 36% кај деца (возраст од 5-17 месеци) и околу 26% кај доенчиња (возраст од 6-12 недели) против клиничка маларија за време на 48-месечно следење.
Маларијата е многу сериозна заразна болест која се пренесува преку комарци и е најмногу застапена во тропски региони како суб-сахарска Африка, Азија и Латинска Америка. Од маларија може да се заразат и луѓе, но и други животни. Кај луѓето, оваа болест предизвикува симптоми кои обично вклучуваат треска, замор, повраќање и главоболки, а во тешки случаи, може да предизвика жолта кожа, напади на мозокот, кома или смрт.
На годишно ниво, маларијата убива околу 400,000 луѓе, од кои најмногу се деца кои живеат во суб-сахарските држави во Африка. Токму заради оваа висока смртност, како и трагичноста на фактот дека возрасната група кај која има оваа болест има највисока смртност се децата, е всушност многу возбудливо што новата вакцина има волку ветувачки резултати. Светската здравствена организација, како и некои приватни донатори – имено милијардерот Бил Гејц и неговата сопруга Мелинда Гејц – долго време се залагаат за искоренувањето на оваа болест, но до сега имале лимитирани резултати.
Директор на институтот Jенер и професор по вакцинологија на Универзитетот во Оксфорд, д-р Адриан Хил, кој е дел од тимот кој ја развива новата вакцина, објаснува дека развојот на вакцината против маларија траеше многу подолго бидејќи маларијата има илјадници гени во споредба со околу десетина различни гени во Корона вирусот и затоа е потребен е многу висок имунолошки одговор за борба против оваа болест.
Наскоро ќе се извршат поголеми испитувања на скоро 5.000 деца на возраст од пет месеци до три години низ четири африкански земји, за да се потврдат иницијаните наодите на тимот на д-р Хил.
Елена Гаговска