Отпорот ќе продолжи се додека Владата на Груевски ја гази демократијата и додека не се постигне договор да се одржат и предвремени парламентарни избори.
Ова е пораката од сите поголеми градови низ Македонија, каде здружената опозиција организираше Караван на отпорот.
Од Штип, Битола, Прилеп и од другите градови беше порачано дека опозицијата нема да излезе на локалните избори на 24 март, доколку не се организираат и парламентарни избори.
„Како можеа на Македонија да и го приредат овој срам? Како можеа по пратеници избрани од граѓаните да удрат со клоци и со тупаници? Кога го избркаа Саве (пратеникот на СДСМ од Гевгелија), тие не удрија само по него. Тие од салата на Собранието избркаа 7.200 гевгеличани… Кога од оваа сала ги избркаа новинарите, десетина минути пред да удрат по пратениците, тие покажаа оти и самите се свесни оти тоа што го прават е криминал – рече Радмила Шеќеринска вечерва пред гевгеличани.
– Куманово и кумановци не се навикнати да ја виткаат кичмата пред ваков ненароден режим. Ние застануваме на страната на правдата и слободата, онака како што му доликува на Куманово, онака како што градот го правел тоа во секој клучен момент за Република Македонија – рече пратеникот Оливер Спасовски, кој заедно со градоначалникот Зоран Дамјановски им се обрати на поддржувачите.
Кандидатот за градоначалник на Шип, Здравко Коцев, рече дека причните за Отпорот се јасни.
– Оваа власт може сè да направи, освен да работи за доброто на народот – истакна тој.
Неговата колешка, пратеничката од опозцијата, Билјана Казанџиска, пак, рече дека претставниците на опозицијата од Штип се постојано меѓу народот и граѓаните и додаде дека ќе се оди до крај.
– Опозицијата во Битола е единствена и сплотена и нема отстапување – одиме до крај. Бараме предвремени парламентарни избори, заедно со локалните, во целосно демократски и фер амбиент. Во спротивно, на 24 март на избори не излегуваме, а целосната одговорност за продлабочување на политичката криза ќе оди на конто на власта – рече на крајот лидерот на социјалдемократите во Битола, Васко Ковачевски.