Анастасија Севастова (27) по втопат во низа ќе игра четврт-финале на Ју-Ес опен. Летонската тенисерка, која во Њујорк е рангирана како 16 носителка, а на ВТА листата е на 146 место, во четвртото коло ја порази Марија Шарапова со 5:7, 6:4, 6:2. Нејзина наредна противничка ќе биде Американката Слоун Стивенс која, пак, во три сета ја елиминира Јулија Гергес со 6:3, 3:6, 6:1.
Шарапова овојпат нагази на мина на Флешинг Медоу. Летонката од Лиепаја одигра брилијантен тенис и заслужено се проби меѓу најдобрите осум на турнирот. Почна нервозно, но како одминуваше мечот го наоѓаше мирот што не успеа да ѝ наруши Русинката со тајм аут за тоалет во третиот сет. Одбрани три меч топки, бекхендот за спас и на четвртата заврши во аут и по два часа и 16 минути мораше да и подаде рака на Севастова.
Дел од провизорните прогнозите за евентуално изненадување укажуваа дека Севастова ќе мора да освои повеќе од 60 отсто поени по прв сервис ако сака да се надева на успех против Шарапова. Во третиот сет, кога ѝ беше најпотребно, таа запиша дури 78 отсто. Беше неспоредливо поуспешна и во играта на мрежа. Шест од седумте излегувања ги реши во своја полза наспроти 11. што ги прослави Русинката во 30. „излети“.
Стручниот тим на Севастова покажа дека одлично ја скенира Шарапова и постави соодветна тактика. Покрај напад со сервис, се инсистираше и на што подлабоко држење на руската тенисерка во нејзиното поле. Такви и беа и најголем дел од ритерните на Летонката, особено во третиот сет во кој во 57 отсто од нападите ја гаѓаше основна линија или околу (36 отсто беа поени), а 43 отсто од вратените топчиња беа „поплитки“ (34 отсто беа поени).
Севастова искористи и пет од шесте брејк прилики за разлика од Шарапова која имаше половичен ефект (3/6). Русинката освои 42 директни поена, а Севастова двојно помалку (21), но најголемата разлика отпаѓа во графата од статистиката насловена како неизнудени грешки. Летонката направи само 14 додека Шарапова дури 51 што е една од клучните причини за конечниот исход, се разбира, заедно со одличниот перформанс на 27 годишната тенисерка од Балтикот.
Ју-Ес опен – натпреварувачки ден 7
Жени, осминафинале
Севастова (16., Летонија) – Шарапова (Русија) 5:7, 6:4, 6:2
Стивенс (САД) – Гергес (30., Германија) 6:3, 3:6, 6:1
Мажи, осминафинале
Карено Буста (12., Шпанија) – Шаповалов (Канада) 7:6, 7:6, 7:6