Граѓаните, жители на улица „Пандо Кљашев“ во општина Кисела Вода не успеаја да го спречат налетот на тешката механизација на градежната фирма „Хантерс“ која гради четирикатна зграда на еден од малкуте останати простори во населбата во Пржино.
Потпорниот ѕид се урнал рано изутрината по што оваа уличка потона во огромната дупка ископана за да се направи простор за темелите на новата градба по димензии кои треба да ги задоволат апетитите на инвеститорите.
„Во вторникот го блокиравме патот за механизацијата која претходно целосно ја уништи уличката која ни е единствен пристап до нашите домови. Залудни беа нашите апели до полицијата и инспекцијата во Општината. Им рековме дека потпорниот ѕид не може да го издржи ова и дека ќе падне, а инспекторите ни се смееја. Ова е срамота. Не се трпи мафијата. И еве што се случи од ветувањата на локалните избори дека ќе се спречат ваквите градби“, вели еден од жителите на улицата „Пандо Кљашев“, кој беше излезен заедно со своите вознемирени соседи на местото на настанот.
Градежните работи започнале на почетокот на јануари, уште пред да биде издадена дозволата за градба, која како што се гледа на таблата поставена од инвеститорот, била издадена на 26 јануари, а правосилност добила на 5 февруари.
Утрово, кога стигнавме на местото на настанот, градежните работи на фирмата „Хантерс“ не се одвиваа. Во еден автомобил затворени седеа тројца работници кои не сакаа да зборуваат со нас, ниту пак со жителите. Во обид да добиеме одговор за оваа урбана хаварија, стапивме во контакт со седиштето на фирмата на улица „Багдадска“. Ја добивме секретарката која ни рече дека нема никој во канцеларијата и дека не знае за што станува збор. На нашето барање да разговараме со управителот и сопственик на оваа фирма основана во 2001 година, Гоце Тодоровски ни рече дека не знае каде се наоѓа.
Телефонски стапивме во контакт и со градоначалникот на општина Кисела Вода, Филип Темелковски кој ни рече дека оди на местото на настанот за да види за што станува збор и добивме ветување дека по увидот ќе ни одговори на нашите прашања.
На заминување од улицата „Падно Кљашев“, минавме и преку малиот мост над каналот кој, како што велат жителите, е следната „жртва“ на градежната механизација, по што улицата ќе остане целосно отсечена од останатата сообраќајна инфраструктура.
Повеќе од ситуацијата на теренот, од фото галеријата.
