Патничките и товарните возови втор ден останаа блокирани откако машинскиот и извршниот персонал во „Железници транспорт“ се одлучи на бојкот поради неисплатениот втор дел од платата за месец декември.

Од кабинетот на генералниот директорот на Железници транспорт, Мубекир Палоши, велат дека штрајкот е незаконски бидејќи бил во спротивност со Законот за работни односи и Колективниот договор. Обвинуваат дека на овој начин машинскиот персонал сака да извлече лична корист преку зголемување на месечните приходи.

„Во услови на пандемија и економска криза, платите на вработените редовно се исплаќаат иако Друштвото се соочува со намалени приходи. Напоменуваме дека штрајкот не е преидзвикан поради социјален момент или други услови поврзани со извршување на работните задачи, туку поради лична корист на машинскиот персонал, кои имаат највисоки примања изнудени со метод на присила, односно преку незаконски прекин на железничкиот сообраќај“, се вели во дописот од Железници транспорт.

Според нив, просечната месечна плата на машиновозачите била близу 51.000 денари, споредено со еден дипломиран инжинер, раководител кој земал 29.000 денари.

Душко Чакаровски, претставник на машинскиот персонал, пак за МИА изјавил дека бојкотот ќе продолжува до исполнување на поставеното барање, исплата на вториот дел од платата за месец декември. Тој рекол дека имало најави од раководството на претпријатието дека вториот дел од платата ќе бил исплатен утре.

Поддршка за штрајкот машиновозачите добија и од Движењето за социјална правда „Обединети работници“.

„Секој работник, независно дали е вработен во приватен или државен сектор, има право на плата согласно завршените работни задачи кои произлегуваат од договорниот однос. Но, исто така, работниците уживаат право и на навремена исплата на платата! Поради тоа што на овие работници континуирано им се јавува проблем со исплата на нивните чесно заработени плати, го повикуваме раководството на “Железници – Транспорт” веднаш да обезбеди средства за целосно исплаќање на сите заостанати плати, како и останати надоместоци согласно закон“, стои во соопштението на „Обединети работници“.

Инаку, согласно Одлуката од 2 ноември 2021 година, машинскиот и извршниот персонал најавија дека нема да ги извршуваат работните задачи ако платата за претходниот месец не биде во целост исплатена до 25-ти во тековниот месец. Одлуката беше донесена по прекинот на работата во ноември, исто така поради доцнење со исплатата на платата. Поради истата причина бојкот имаше и во август лани.

(Б.Б.)