Пандемиата со коронавирусот полека стивнува, а тоа го покажуваат и бројките на новозаразени кои секојдневно се намалуваат. Спротивно на тоа, бројот на вакцинирани граѓани против Ковид-19 од ден на ден се зголемува, а заклучно со вчера вкупно се вакцинирани 241.368 граѓани. Во државата вкупно се аплицирани 362.710 дози вакцини, а ревакцинирани се 121.342 граѓани.
Од вчера започна и вакцинацијата на сите хронично болни пациенти и со ризик од Ковид 19, на возраст од 20 до 40 години, кои се пријавиле за вакцинација до 30 април 2021. Заклучно со утре треба да се вакцинираат лицата во ризик во кои се опфатени повеќе од 40 дијагнози или повеќе од 10 групи на дијагнози кои беа одредени како ризични од страна на Универзитетските клиники и граѓанските здруженија, како кардиоваскулаторни, респираторни, бубрежни, ендокринолошки, малигни, невролошки и останати заболувања и состојби.
Како што вчера најави министерот за здравство Венко Филипче веќе стигна информација од претставниците на „Синовак“ дека во следните седум дена може да очекуваме да стигне пратката со 500 илјади нивни вакцини.
Помош во вакцини за земјава најавија Грција и Бугарија. Грчкиот премиер Кирјакос Мицотакис пред десетина дена од Брисел изјави дека Грција ја разгледува можноста билатерално да ги поддржи соседните земји со вакцини, а министерот за здравство Венко Филипче во понеделникот откри дека можеме да очекуваме 70.000 дози од вакцините, од кои 50.000 од Бугарија и 20.000 од Грција.
Бугарија, пак, планира да донира до 150.000 вакцини „Астра Зенека“ на државите од Западен Балкан. Бугарскиот технички министер за здравство Стојчо Кацаров вчера информира дека Северна Македонија, Косово, Албанија и Босна и Херцеговина веќе имале пратено барања до Бугарија.
По подолго време во ковид центрите во Скопје вчера немаше нови хоспитализирани пациенти поради компликации од корона вирусот.