“Не е точно и не е вистина дека исламот може да се изедначи со тероризам”, изјави вчера Папата Франческо во Краков каде се одржува Меѓународните денови на младите, годишен настан на кој се собираат младите католици од светот.
Папата беше почесниот гостин на овој настан. Тој одби да направи амалгам помеѓу исламот и тероризмот и додаде дека католиците можат исто така да бидат насилни како и муслиманите. Според него, Европа е таа која турка еден дел од своите млади кон тероризмот.
Изјавите дојдоа по терористичкио напад во една црква во Франција во која беше убиен еден католички свештеник.
“Не мислам дека е праведно да се изедначува исламот со насилство. Секој ден, кога отворам весник, гледам насилство во Италија, некој што ја убил неговата девојка, друг кој ја убил таштата и сите тие се крстени католици”, изјави Папата во авион патувајќи кон Краков.
“Ако треба да зборувам за исламско насилство, тогаш морам да зборувам и за христијанско насилство. Во речиси сите религии отсекогаш имало група на фундаменталисти. И ние имаме такви”, рече тој.
Папата тврди дека религијата не е моторот на насилството: “И јазикот може да убие исто како и ножот”, изјави тој мислејќи на големиот пораст на популистички партии кои носат расизам и ксенофобија.
“Тероризмот просперира кога богот-пари е ставен на прво место и кога нема друга опција. Колку млади од Европа оставивме без идеали, без работа? Тогаш тие се вртат кон дрогата, алкохолот и одат во фундаменталистички групи”, рече Папата.
Истата порака стаса и од претставниците на муслиманите во Франција. По убиството на францускиот свештеник, вчера муслиманите во Франција и Италија присуствуваа на неделните миси во црквите како знак на солидарност и братство со католичките браќа.