Колони возила долги повеќе од 700 километри во Париз, стотици заробени камиони, Ајфеловата кула е затворена…ова се последиците од снегот, што синоќа падна во главниот град на Франција и во северниот дел од државата.
Според Метеоролошката служба, снегот го отежнал одвивањето на сообраќајот на запад и североисток преку регионот Париз.
Во Париз и околината има 739 километри заглавени возила, соопшти авто-мото службата Ситаден.
Автобусите што вршат јавен превоз во главниот град и предградијата претходно беа вратени во депоата.
Ниту денеска нема да има школски превоз во повеќе делови од Франција, особено во регионот на Париз.
Состојбата може да биде критична од ноќеска до утре со пад на температурите и до минус 10 степени и појава на „леден дожд“ на веќе снежниот терен, најавуваат од Метеоролошката служба.
Националната железничка компанија соопшти синоќа дека е намалена брзината на возовите со што се предизвикани доцнења додека линијата за возови со голема брзина Атлантик има пречки.
Компанијата што управува со Ајфеловата кула ја затвори поради временските услови.
Дваесет и девет француски департмани објавија во понеделникот „предупредување за исклучително ниски температури“.
В петок е можен нов снежен бран од северозапад.
Овој јануари е најстуден во последниов век, додека рекордните количини дожд предизвикаа поплави во неколку региони на Франција.
Македонски патници „заглавени на аеродромот Буве“
До редакцијата на НОВА пристигна информација дека околу 50 патници кои летале со „Виз Ер“ од Скопје до Буве, вчера по пристигнувањето на аеродромот кој се наоѓа надвор од Париз, останале заглавени се до денеска претпладне.
Автобусот кој ги зема патниците од Буве и ги превезува до централниот дел на Париз, вчера не можел да пристигне поради снежните насипи, така што патниците останале цела ноќ на аеродромот.