Парижаните се запрепастени од шокантното убиство на 12-годишна ученичка чие тело беше пронајдено во петокот во контејнер во дворот на нејзината станбена зграда.
Девојчето, по име Лола, го поминало денот нормално на училиште. Нејзиниот татко дигнал тревога кога таа не се вратила дома во попладневните часови.
Подоцна вечерта, во приземјето на зградата беше пронајдена проѕирна пластична кутија во која беше нејзиното тело.
Злосторството се случило во 19-от арондисман на Париз кој е познат по дрога на улиците и криминал.
Таткото на Лола е вработен како чувар во станбениот блок. Нејзиното тело било пронајдено згмечено во кутијата, и покриено со материјал. Рацете и стапалата и биле врзани а на вратот имала убодни рани. Обдукцијата, сепак, покажа дека таа починала од задушување. На нејзините нозе убиецот напишал два броја „0“ и „1“.
Полицијата го уапси главниот осомничен за убиството – 24-годишна жена родена во Алжир, именувана како Дахбија Б. Жената била видена на безбедносното видео снимено во станбената зграда, на кое се гледа како влегува на главната врата во петокот попладне во друштво на Лола. Подоцна била видена како ја напушта зградата како влече куфер, а потоа и како се тетерави на улицата.
Сепак, полицијата вели дека не верува дека станува збор за сериозна трага по можниот извршител на злосторството.
Во притвор е и 43-годишен маж за кој се верува дека ги превезувал Дахбија Б. и куферот во неговиот автомобил. Полицијата смета дека, откако тој ја возел низ париските предградија, Дахбија Б. се вратила во станбената зграда – каде што живее и нејзината сестра. Таму двете сестри имале караница, пред Дахбија Б. повторно да замине – овој пат без куферот.
Полицијата отвори истрага за убиство на малолетно лице придружено со тортура и варварство.
Во училиштето на Лола, децата и родителите се потресени. Училиштето вчера го посетија министерот за образование Пап Ндијаје и градоначалничката на Париз, Ан Идалго, а тимови за психолошка поддршка ги утешат учениците.
Брижит Макрон, сопруга на претседателот, рече дека тоа е „апсолутно одвратна и неподнослива трагедија“.
Извор: Би-Би-Си