Социјалистичката партија (ПС), која всушност има социјал-демократска ориентација, на сегашниот албански премиер Еди Рама е моментално во водство.
55% од избирачките места беа обработени денес и за сега партијата на Рама има освоено 50,5% од гласовите што би значело дека ПС би добиле 75 места во албанскиот парламентот од вкупно 140 места. Ако по броењето на сите гласови, овие резултати останат слични, тогаш премиерот Рама ќе може да си обезбеди уште еден мандат како лидер на Албанија. Тоа би било третиот мандат на Рама како премиер и би било нешто што ни еден албански политичар не го достигнал до сега.
Двете најголеми опозициски партии немаат ни блиску толку гласови колку партијата на Рама. Демократската партија (ПД), партија со конзервативна политичка ориентација, доби 39,2 проценти од гласовите, односно 56 места во парламентот, а Движењето за социјалистичка интеграција, социјал-демократската партија која се одвои од ПС во 2004, доби 7,3 проценти и шест места.
Главниот против-кандидат на Рама беше Лузим Баша од конзервативната ПД, зад кој застанаа уште дванаесет други партии во обединетета коалиција. Баша ја има обвинето владата на Рама за корупција и поврзаност со организираниот криминал.
„Овие избори се најодлучни за патот на Албанија кон ЕУ“, изјави Ервис Илјазај, професор по политички науки на Европскиот универзитет во Тирана.
Според претседателот на Централната изборна комисија Илирјан Целбаши, вчерашното гласање беше успешно спроведено. Исто така вчера за прв пат во Албанија се користеше електронска идентификација на изборите и имаше минимални проблеми со оваа технологија.
Сепак резултатите сѐ уште не се финални. Исто така сѐ уште не се знае дали ќе влезе во парламентот независниот кандидат Елтон Дебреши кој е рудар од Булќиза. Дебреши сака да ги застапува интересите на рударите кој тој смета се заборавени од страна на политичкиот естаблишмент. Дебреши исто така доби поддршка од страна на поранешниот левичарски Министер за финансии на Грција, Јанис Веруфакис.
“Секој пратеник од овој регион е сопственик на рудник за хром или сопственик на хидроцентрала, шуми или каменоломи. Со еден збор, тие не беа од нашата класа”, изјави Дебреши за Reuters. Дебреши исто така беше интервјуиран околу неговата кандидатура од Џејлан Велиу за македонскиот подкаст „Гласни идеи“.
Елена Гаговска