Еквадор воведе нови правила за запирање на бранот мигранти од Венецуела кои влегуваат во земјата без пасош, со што многумина останаа заглавени во соседна Колумбија.
Илјадници Венецуелци кои ја напуштаат земјата поради економската и политичката криза, преминуваа во Еквадор од Колумбија, користејќи само лични карти. Отсега тие за да ја минат границата ќе мора да имаат пасоши.
Повеќето патуваат на југ за да им се придружат на членовите на семејствата во Перу и Чиле.
Колумбија протестираше против овој потег, укажувајќи дека со воведувањето на забраната овие луѓе ќе бидат заробени од нејзината страна од границата.
Во последниве 15 месеци, повеќе од еден милион мигранти од Венецуела влегле во Колумбија, а повеќе од 4.000 пристигнуваат секојдневно на границата на Еквадор.
Одлуката на Еквадор да ја затвори границата за оние без пасоши стапи на сила вчера.
-Не знам што ќе правиме, но не можеме да се вратиме. Немате поим како е во Венецуела. Цели семејства јадат од ѓубрето, изјавуваат за светските агенции дел од мигрантите.
Според Кристијан Кругер Сармиенто, директор на Агенцијата за миграција на Колумбија, изјави дека потегот ќе создаде само повеќе проблеми.
-Барањето пасош нема да ја запре миграцијата, бидејќи ова население не ја напушта земјата од задоволство, туку од неопходност, изјави тој.
Бразилците не ги сакаат мигрантите
Зголемувањето на бројот на мигрантите од Венецуела предизвика тензии во регионот, по што владата на Перу во петокот објави имиграциски мерки слични на Еквадор, со што преминот на границата од 25 август ќе биде можен само со пасош.
Во февруари, колумбискиот претседател Хуан Мануел Сантос најави засилена гранична контрола, што резултираше со наплив од илјадници Венецуелци на премините.
Бразил, кој граничи со Венецуела, исто така, изрази загриженост и привремено ја затвори границата на почетокот на овој месец. Насилства се појавија во пограничната држава Рораима, каде што илјадници жители на Венецуела живеат во небезбедни сместувалишта.
Во пограничниот град Пакараима во саботата, неколку мигранти логори беа нападнати од гневни жители.
Нападите следеа по протестите во градот откако сопственикот на локалниот ресторан беше, наводно, ограбен и претепан од Венецуелци.
Според извештаите, стотици Венецуелци биле принудени да бегаат преку границата, додека жителите запалиле се што оставиле зад себе.
Според други извештаи, на венецуелската страна на границата имало напади врз бразилски автомобили.
Што се случува со Венецуела?
Венецуела е погодена од највисоката инфлација досега, со сериозни недостатоци на основни прехранбени производи и лекови, иако се работи за земја богата со нафта.
Се вели дека многумина гладуваат, поради што се принудени да напуштат земјата во потрага по подобри економски услови.
Земјата исто така се наоѓа и во политичка криза. Минатата година голем број демонстранти беа убиени во судирите во текот на неколкумесечните антивладини протести.
И покрај напорите на опозицијата за соборување на претседателот Николас Мадуро од функцијата, тој беше реизбран на изборите во мај.
Обидот за атентат на Мадуро на почетокот на овој месец уште повеќе ги зголеми тензиите во земјата.