Во моментот цените слободно се формираат, но имаме надлежност да провериме дали новите цени се евидентираат согласно Правилникот или има отстапувања, велат од Државниот пазарен инспекторат.
Инспекторите на Државниот пазарен инспекторат од денеска се во акција – почнаа да вршат контроли на новите цени на прехранбените артикли и дали истите се зголемени согласно Правилникот за водење на евиденција во трговијата на големо и мало.
Во врска со тоа што овојпат ќе се проверува кај цените, бидејќи завчера престанаа да важат антикризните мерки и цените слободно се формираат, директорката на ДПИ, Анета Симеска Димоска, за НоваТВ изјави:
– Во моментот цените слободно се формираат, но имаме надлежност да провериме дали новите цени се евидентираат согласно Правилникот или има отстапувања. Бидејќи треба да се направи нивелација на цени и тоа да се евидентира кај секој субјект. А согласно законот, маржите сега сами си ги одредуваат. Ограничувањата на профитните маржи беа оние на одредени производи кои изнесуваа 0 и 4 проценти, а во моментов повеќе нема ограничувања во посебни услови. Додека, за ДДВ-то има производи со 5 и 18 отсто данок, но тоа го проверува Управата за јавни приходи. Ние веќе почнавме да ги контролираме и големите синџири маркети и другите субјекти, проверката ќе потрае, ни рече Симеска Димовска.
Таа додаде дека денеска до 14 часот контролите не утврдиле неправилности кај трговците коишто биле инспектирани.
Вицепремиерот за економски прашања Фатмир Битиќи предупреди дека „не може поскапувањата да бидат за 20 отсто за 24 часа“, појаснувајќи дека трговците и останатите дејности во голем дел се служат со манипулации со цените и дека ќе мора да реагираат инспекциските служби.
– Со особен интерес ги следиме цените во последните три дена на слободниот пазар и има некоректно, неетичко и неморално однесување на одредени компании кон зголемувањето на цените, што ќе наиде на одговор на институциите. Не може цената да порасне за 24 часа за 20 отсто, кога производствената цена не пораснала за 20 отсто во тие 24 часа. Тоа е една одредена манипулација кон нашите граѓани и затоа соодветно ќе реагираат инспекциските служби од кои очекувам извештај, нагласи Битиќи.
(Љ.Б.)