Оваа година Европа и речиси цела хемисфера имаат пеколно лето. Топлотниот бран се простира од Алжир до Арктик. Високите температури вообичаени се за летниот период, но зачестеноста на топлотните бранови со години се зголемува, што е последица токму на климатските промени, сметаат експертите.
Катаклизмичните шумски пожари во околината на Атина, сушата во нордиските и балтичките земји, лето со температури над 30 степени во Канада и над 40 степени во Јапонија се последица на глобалното затоплување на планетата за еден степен во последните сто години, сметаат метеоролозите.
Тие објаснуваат дека живееме во еден период на забрзана транзиција, во некој нов климатски режим на нашатата Планета и една од последиците на тој еден степен е интензивирање на топлотните системи. Речиси четири петтини од топлотните бранови воопшто не би постоеле да не се случила таа промена од само еден степен.
Исто така и сите останати параметри со кои се мери здравјето на Планетата исто така се промениле. Дождовите се се поинтензивни и зачестени, нивото на океаните е зголемено поради топењето на мразот на половите. За научниците ова не е изненадување, бидејќи овие промени тие ги предвиделе уште пред 20 години. И тие ќе продолжат да се случуваат, дури и ако се оствари целта на Парискиот договор за намалување на емисијата на јаглерод диоксид на нула до 2050 години.
Но, метеоролозите велат дека најдрастичните и најинтензивните промени допрва се очекуваат во иднина. Доколку се остварат песимистичките прогнози, глобалната температура би можела да порасне и за 4 до 5 степени, што ќе донесе уште поекстремни временски услови.
Проблемот според нив е во тоа што никој не сака долгорочно планирање, па проблемите се решаваат тогаш кога ќе се случат.