Темата за медиумската писменост станува се поважна за граѓаните и демократијата, истакна претседателот Стево Пендаровски на регионалната конференција ‘Западен Балкан – ЕУ’. Тој кажа дека во доба на дигитализација, информираноста се повеќе доаѓа од интернетот, каде често знаат да кружат и дезинформациите.
-Интернетот лесно може да стане од алатка за информирање во алатка за дезинформирање, а дезинформациите веќе се сметаат за закана за националната безбедност, вели Пендаровски.
Претседателот додаде дека силно присутна е ‘инфодемијата’ која периодов пречи во зачувувањето на јавното здравје.
-Треба повеќе кампањи за запознавање на граѓаните како да препознаат информација и дезинформација, бидејќи само така ќе се победи вирусот на инфодемијата, заклучи Пендаровски.
На конференцијата, преку видео обраќање, учествуваше и потпретседателот на Европската комисија, Жозеп Борел, кој подвлече дека треба да се крене свеста за значењето на медиумската писменост.
-Граѓаните на Западен Балкан се се повеќе свесни за медиумската писменост и Европската унија ќе продолжи да финансира и поддржува активности во оваа насока, изјави Борел, потенцирајќи дека е потребен зајакнат владин и општествен пристап за зајакнување на медиумската писменост.
-Западен Балкан е во срцето на ЕУ и навистина е продуктивно заеднички да се справуваме со предизвиците, заклучи Борел. Евроамбасадорот во земјава, Дејвид Гир потсети на Извештајот на Институтот ‘Отворено општество’ – Софија, каде Северна Македонија е на дното на листата европски земји по медиумска писменост и влијание на лажни вести.
-ЕУ е посветена во борбата против лажните вести. Инвестирањето во медиумската писменост бара широк пристап, а клучна улога тука играат и проверувачите на факти, нагласи евроамбасадорот Гир.
Л.А.