„Најтрагично е што стануваме имуни на туѓото страдање и на туѓата болка, а сочувството и солидарноста исчезнуваат од нашите животи како реликти на некое минато време. Од уметност на живеење денес дојдовме до уметност на преживување“, рече претседателот Стево Пендаровски на синоќешното отворање на 62. издание на „Охридско лето“.
Прашање е, рече тој, како воопшто човековата цивилизација се најде во ваква безизлезност и покрај сите мрачни историски лекции и преживеани катастрофи. „Меѓутоа, далеку поважно е прашањето и одговорот на него: Што е она што повторно може да го хармонизира и облагороди животот, да го врати значењето на етиката, да ја актуализира хуманоста“?
Пендаровски посочи и дека во епохата на информациско-технолошки и научен развој, наместо луѓето да бидат посигурни и посреќни, живеењето на многу места во светот се претвора во борба за власт, доминација над другите и во опседнатост со материјалното. „Сведоци сме на воени конфликти, глобални здравствени закани, непочитување на човековите права и слободи, понижување на достоинството, тектонско изместување на вредностите и губење на моралниот компас“, подвлече Пендаровски.
Тој му оддаде признание на шестдецениското постоење на фестивалот „Охридско лето“ и го потенцираше значењето што на програмата се присутни и врвни македонски музички и театарски уметници, чии што креации ѝ се добро познати и на домашната и на светската публика. (Р.Н.)