Полицискиот службеник Мунир Пепиќ денеска во судот изјави дека за време на настаните во Собранието на 27 април ѝ облекол докторски мантил на пратеничката од СДСМ Радмила Шекеринска за да ја евакуираат.
-Во Собрание бев на задача како вработен во Агенцијата за разузнавање за да следам лице кое беше влезено со толпата, а за што имав наредба од претпоставените, за што изготвив и извештај. Во еден момент кога настана гужва а веќе го изгубив лицето кое го следев влегов во просторијата во која беа повредените пратеници меѓу кои и Радмила Шекеринска. Јас заедно со другите колеги кои беа таму од шестата управа и помогнав на Шекеринска да се затскрие и успешно да се евакуира. Му помогнавме и на еден друг колега кој беше повреден. Излегов од Собранието и се вратив во Агенцијата каде го подготвив извештајот, рече Пепиќ.
-Јас не сум терорист секогаш сум работел за интересите на Република Македонија, рече Пепиќ на јавната седница во Апелација на која се разгледува жалбата за продолжениот притвор за вработениот во Агенцијата за разузнавање.
Обвинителството пак побара жалбата да биде отфрлена и решението за притвор да биде потврдено.
Неговиот адвокат, Еленко Миланов, рече дека Пепиќ е сомничен во случајот „Титаник“, одземен му е пасошот и се јавува редовно во судот, па нема како да избега.
Началникот Душко Лазаров, кој е еден од осомничените за настаните во Собранието на 27 април денеска изјави дека не е виновен и не дека планира да бегам, а дека доколку сакал да влијае врз сведоци ќе го направел тоа и дека неговиот работен однос е во мирување поради притворот.
Адвокатите на Лазаров посочија дека образложението за продолжување на притворот е паушално и не биле сослушани сведоци додека тој е во притвор.
Тие бараат да се преиначи решението на кривичниот совет и наместо притвор, Лазаров да добие куќен притвор. Вишото обвинителство инсистира притворот да остане со цел да се озбебеди присуство за oсомничениот да не влијае врз сведоци и да прикрива докази. Душко Лазаров вечерта кога се случија крвавите настани во Собранието бил во Оперативниот штаб.
На јавната седница, освен за жалбите на Пепиќ и на Лазаров, ќе се расправа и за продолжениот притвор на поранешниот министер за внатрешни работи и директор на Бирото за јавна безбедност Митко Чавков, како и за притворот на поранешниот директор на Македонска опера и балет, Игор Дурловски.