Пред помалку од три години, Борис Џонсон ги предводеше конзервативците до нивната најголема изборна победа од 1987 година, а сега ја загуби поддршката од своите пратеници и треба да поднесе оставка. Како дојде до ова?
Би-Би-Си наведува пет причини за падот на Џонсон.
Аферата Крис Пинчер
Во средата на 29 јуни, пратеникот Крис Пинчер – отиде во приватен клуб во Лондон. Тој беше обвинет дека допирал двајца мажи, што доведе до голем број слични обвинувања, некои од пред неколку години. Така започна синџирот на настани кои завршија со падот на премиерот. На почетокот Даунинг стрит рече дека Џонсон не бил свесен за „конкретни наводи“ за Пинчер пред да го назначи на функција во февруари.
На 4 јули, Би-Би-Си објави дека Џонсон знаел за приговорите околу Пинчер. Следниот ден, поранешен државен службеник – Лорд Мекдоналд – рече дека на премиерот му била кажано лично за приговорите. Џонсон тогаш призна дека му било кажано во 2019 година и се извини што го назначил Пинчер за заменик министер.
Прекршување на ковид карантинот
Во април оваа година, премиерот Џонсон беше казнет поради кршење на правилата за карантин, откако присуствуваше на собир на неговиот роденден во јуни 2020 година. Тој, исто така, се извини што отишол на забавата во градината на Даунинг стрит за време на првиот голем карантин во Велика Британија. Метрополитенската полиција во тоа време издаде 126 казни на 83 лица за кршење на карантинот во Даунинг Стрит.
Беа откриени и цела серија социјални настани од политичкиот персонал на Џонсон со кои го кршеле карантинот а во фокусот на повеќето беа Џонсон и неговата млада сопруга Кери.
Криза на трошоците за живот – и зголемување на даноците
Инфлацијата во Велика Британија нагло порасна во 2022 година, до сегашната стапка од 9,1 отсто. Многу од причините беа надвор од контролата на Борис Џонсон. Руската инвазија на Украина, на пример, доведе до пораст на цените на нафтата и на цената на храната. И, иако владата презеде некои чекори – на пример, со намалување на давачката за гориво, владата исто така продолжи со зголемување на даноците во април. Владата рече дека зголемувањето на даноците е за подобра здравствена и социјална заштита.
„Среде најлошата криза на трошоците за живот“, рече лидерот на лабуристите Сер Кир Стармер во април, „владата избира да ги зголеми даноците“.
Овен Патерсон
Во октомври 2021 година, Комитетот на Долниот дом препорача 30-дневна суспензија за тогашниот конзервативен пратеник Овен Патерсон, сопартиец на Џонсон. Комитетот рече дека тој ги прекршил правилата за лобирање, за да се обиде да им биде од корист на повеќе компании кои му плаќале.
Но, конзервативците – предводени од премиерот – гласаа за укинување на неговата суспензија и формираа нов комитет за да добијат на време. По обелоденувањето на скандалот случајот заврши со оставка на пратеникот Патерсон. Џонсон подоцна призна дека не се снашол во справувањето со случајот.
Недостаток на фокус – и идеи
Борис Џонсон го освои своето огромно мнозинство врз основа на јасна, лесна за следење политика со мотото „Заврши го Брегзит“. Но, оттогаш, велат неговите критичари, во Даунинг стрит има недостаток на фокус и идеи. Неговиот поранешен советник кој му стана главен критичар, Доминик Камингс, постојано го обвинуваше дека е нестабилен и дека е под влијание на жена му.
Во јуни, конзервативниот пратеник и поранешен министер Џереми Хант го обвини Џонсон дека нема „интегритет, компетентност и визија“. Хант зборуваше при расправата за гласањето на доверба на Џонсон која тој да доби, но критиките кон него стануваа се погласни. (Би-Би-Си)