Пратеничката Славјанка Петровска од СДСМ денеска на прес конференција побара итна декласификација на целата документација поврзана со случајот во Агенцијата за национална безбедност (АНБ), оценувајќи дека станува збор за обид на власта да го прикаже случајот како скандал, без да понуди конкретни докази или информации.
На прес-конференција, таа порача дека секој функционер има одговорност да ги штити интересите на државата и граѓаните, а не да шири нецелосни, конфузни и недоречени информации за партиски цели.
„Во никој случај, и за ничии интереси, а најмалку за лични или тесно партиски, на граѓаните не смее да им се соопштуваат нецелосни и манипулативни информации. Тоа е неодговорно однесување“, изјави Петровска.
Пратеничката оцени дека досегашните изјави на власта се „штури и бледи“, и дека целта е политичка манипулација, а не вистинска борба за отчетност. Според неа, единствениот начин вистината да излезе на виделина е преку итна декласификација на сите документи.
Петровска упати и правна аргументација за своето барање, повикувајќи се на Член 14 од Законот за класифицирани информации, каде што се наведува дека создавачот на документот е и оној што може да ја промени неговата класификација. Дополнително, според Член 20 од истиот закон, ако класифицираната информација прикрива кривично дело или злоупотреба на функција, таа не смее да остане класифицирана.
„Ако се земат предвид тврдењата на власта за наводни злоупотреби, токму тој член овозможува итна декласификација – без изговори и одолговлекувања“, вели таа.
Како втор чекор, СДСМ бара итно свикување на собраниската Комисија за надзор над работата на АНБ, за да се спроведе увид во декласифицираната документација.
„Пратениците кои сме членови на Комисијата имаме обврска да го извршиме овој надзор и потоа да ја информираме јавноста за нашите сознанија“, изјавија од партијата, додавајќи дека декласификацијата ќе ја отстрани и моменталната пречка за свикување на Комисијата, односно недостатокот на безбедносен сертификат на нејзиниот претседател, потенцираше Петровска.
Според неа, на овој начин ќе се „растера маглата“ што, како што вели, ВМРО-ДПМНЕ намерно ја создава за да се одвлече вниманието од сопствените скандали и да се создаде основа за спојување на АНБ со АР, што го оценуваат како ризичен потег.
„Спојувањето на АНБ со други институции не е механичка операција, туку сложена интелектуална реформа која, ако не се спроведе внимателно и во согласност со државните интереси, може да има сериозни последици“, порача пратеничката.
Славјанка Петровска на прес конференцијата нагласи дека АНБ е столб на националната безбедност, и дека секоја злоупотреба или политичка контрола врз оваа институција претставува директна закана за државниот уставен поредок и стабилноста на државата.